Марий Эл Республикын тӱҥ онаеҥже Александр Таныгин калыкым Пеледыш пайрем дене саламлен.
«Пасу пашам пытарымеке, марий-влак, иктеш погынен, пайремым куатлын пайремлат. Нунын дене пырля пӱртӱсат юарла, чевер кече онча, чонланат моткоч ласка. Пеледыш пайрем тӱня мучко илыше марий-влакым уша. Пошкырт, Татарстан, Одо, Виче, Урал, Угарман, Йӱдвел кундемла, Моско да Санкт-Петербург олала гыч марий-влак Йошкар-Олашке вашкат, ош марий вургемым чиен, таҥ тошкалын, Ош Сандалык Юмынам пагален, чолган, ӱшанлын ончыко каят. Пырляште – вий!», — палемда Таныгин.
«Пеледыш пайрем — калык-влакым ушышо, тӱнямбалне тыныслыкым аралыше ик ужаш. Курымла дене ваш келшен илена. Кызытат келшымаш кылна пеҥгыде. Тек ончыкыжымат тиде суапле корнына тӧр лиеш», — ойла онаеҥ.
«Шӱмбел марий калыкем, Пеледыш пайрем дене! Шочмо калыкын йылмыжым да ойыртемжым самырык тукым да икшыве-влак коклаште шарыза. Ӱшанем, марий-влаклан келшыше поро да унам вашлийын моштымо кумыл «Пеледыш пайремыште» оза лиеш. Чылаланда кужу ӱмырым, куатле илыш вийым, у сеҥымашым тыланем!», — тылана онаеҥ.