Единый кугыжаныш экзаменыште Марий Элыште 29 выпускник эн шуко баллым налын

Единый кугыжаныш экзаменыште чылаже 29 выпускник эн шуко баллым налын.

Школым тунем пытарыше ӱдыр-рвезе-влак балым эртарен колтеныт гынат, Единый кугыжаныш экзамен дене лектышым але пален гына налыт. Тиде гана лектыш обществознаний дене пале лийын. Тений Марий Элыштына тиде предмет дене кум еҥ шӱдӧ балл гыч поген.

Чумыр иктешлымашым ышташ гын, таче кечылан республикыштына Единый кугыжаныш экзаменыште чылаже 29 выпускник эн шуко баллым налын. Нунын кокла гыч тыгай тунемше-влакат улыт, кудышт эсогыл кок предмет дене 100 балл гыч погеныт.

Ӱмаште тыгай лектыш дене ик еҥ гына кугешнен кертын. Тений эсогыл кум ӱдыр тыгай радамышке логалын. Тыге кок предмет дене, руш йылме да обществознаний дене, 100 балл гыч Экономико-правовой гимназий гыч Бикмулина София ден Медведево районысо Кузнецово кыдалаш школ гыч Соснина Виктория погеныт. А теве Морко районышто шочшо, Политехнический лицей-интернатым тунем пытарыше ӱдыр Шуралёва Анастасия руш йылме да химий дене эн шуко баллым налын.

Кидшер
Шонымашым ешараш