Кечым иктешлен: сӱрем тылзын 2-шо кечысе тӱҥ увер-влак

Сӱрем тылзын 2-шо кечысе тӱҥ увер-влак.

Йошкар-Оласе Чавайн бульварын Воскресенский проспект деч Киров урем марте ужашыжым пужен ышташ палемдыме. Тудын могай лийшашыжым пален налаш манын соцсетьыште оласе калыкын шонымашыжым погымо. Эн шуко йӱкым велосипед корным ышташ темлымаш поген. Кокымшо верыш перголым але оҥа леведышан теҥгыл- влакым вераҥдаш шонымаш лектын. Тудо светодиод гирляндан лийшаш. Кумшо верыште кушкылым ешарен шындымаш улыт. Уэмдыме кумдыкышто асфальт шартышым брусчатке дене вашталташ палемдыме. Йоча площадке-влак почылтшаш улыт. Чавайн бульвар ден Петров урем ушнымаште йол йымлсе светофор лийшаш. Тиде-бордюрышто волгалтше полоса. Тудын тӱсшӧ «Шого» але «Ошкыл» манын кӱштымашым пуа.

Марий Турек районысо Кугу Карлыган ялыште тӱвыра пӧртым пужен ыштат. Тиде сомыллан тӱрлӧ кӱкшытан бюджет гыч 10 миллион утла теҥге оксам ойырымо. Контракт почеш окна ден омсам вашталтат, кӧргӧ да тӱжвал могыр гычат пырдыжым тӧрлат, электро снабжений вашталтеш. Пашам тений ноябрьыште мучашлышаш улыт. Карлыган тӱвыра пӧртым 1973-шо ийыште чоҥымо. Тудо 8 ялысе калыкым обслуживатла. Тушто книгагудо да удмурт тӱвыра рӱдер верланат. Тӱвыра министр Константин Ивановын мутшо почеш, республикын 100 ияш лӱмгечыжлан ямдылалтме кышкарыште музучилищын концерт залжым олмыктымо, Чавайн лӱмеш книгагудышто паша мучашлалтеш, Шереметев замкыште реставраций тӱҥалшаш, Волжскышто тоштерым олмыкташ палемдыме. Кугу паша Шкетан театрыште шукталтеш.

Йошкар-Олаште боевой действийлан ветераныштын кечыжлан пӧлеклалтше мероприятий-влак эртеныт. Тудын эше официальный статусшо уке гынат, кажне ийын кӱлешлыкше кугемеш. Ветеран- влакын кечышт посна сар дене кылдалтын огыл. Тудо Афганистаныште, Чечняште, Азий, Африке, Латино-Американ эллаште шке элна верч порысыштым шуктышо ветеран-влаклан пӧлеклалтеш. Теҥгече Йошкар- Олаште икмыняр мероприятий лийын. Эн ончыч Благовещений кафедрал собор деч тӱҥалын Воин Чап мемориал марте ырес дене ошкылмаш эртен. Митингын официальный ужашыже мемориал деке пеледыш аршашым пыштымаш дене мучашлалтын. Вара рӱдӧ паркын кеҥеж эстрадыштыже патриот муро концерт лийын.

Аркадий Сергеев

Кидшер
Шонымашым ешараш