Кечым иктешлен: сӱрем тылзын 4-ше кечысе тӱҥ увер-влак

Сӱрем тылзын 4-шо кечысе тӱҥ увер-влак.

Республикыштына «Вятка» автокорнын 9 меҥге кужытшым олмыктымо. Вич меҥге кужытшо Марково ден Ивановка ялла гоч эрта. Специалист-влак корным пеҥгыдемденыт, вӱд пучым пыштыме верлаште вашталтышым ыштеныт. Мландын ойыртемжылан кӧра, тушто корно кӱкшыт эре вашталтын. Сандене дренажым ыштеныт. Корно тӱрым пеҥгыдемденыт. 800 метр кужытышто электротурым пуртеныт, 600 метрыште барьерым вераҥденыт, 57 корно палым да разметкым ыштыме. Марково да Ивановка яллаште илыше- влаклан йӧнан лийже манын, тротуарым, йолгорным да машинаш шичме верым тӧрленыт.

Марий Элыште эше ик тӱзландарыме йӱштылмӧ вер почылтын. «Молодёжный» пляжым Марий Турек районышто илыше- влаклан келыштарыме. Тудым Марий Возармаш ял воктене эҥер серыште ыштыме. Калыклан вургемым вашталтен чийыме верым, кече деч авыртышым, санитар верым ыштыме. Утарыше-влакын постыштат пашам ышта. Игече пеш ок куандаре гынат, республикыште 41 пляж уло. Эше 120 верым йӱштылаш келыштарыме.

Йошкар- Оласе уремлаште у урно- влак ешаралтшаш улыт. Администрацийын умылтарымыж почеш 300 штук лийшаш. Торгым эртарыме деч вара нуным кондаш муниципал контрактым пеҥгыдемдыме. Урно-влак кӱртньӧ бетон гыч ыштыме улыт да кужу жап кучылталт кертыт. Нуным нумал каяш але вашке пудырташ ок лий. Ик урнын нелытше — 130 наре килограмм. Кӧргыштыжӧ посна ведра але пакет вераҥдалтеш. Урно-влакым тиде тылзе мучаш марте вераҥдышаш улыт.

Аркадий Сергеев

Кидшер
Шонымашым ешараш