Республикым вуйлатыше Александр Евстифеев Российысе финанс министр Антон Силуановын калыкле проектлам шыҥдарыме йодыш дене эртарыме совещанийыште лийын. Тудо видеоконференций йӧн дене эртен. Регион кӱкшытыштӧ калыкле проект- влакым шыҥдараш оксам ситарымашым тергыме нерген ойлымо. Поснак «Паша лектыш да калыклан пашаверым муаш полшымаш» калыкле проектеш шогалме. Регионлам вуйлатыше- влак паша опыт дене палдареныт да проектлам пайдалын шыҥдараш темлымаш- влакым луктын каласеныт.

Козьмодемьянскысе Яков Эшпай лӱмеш калык тӱвыра рӱдер негызеш виртуал концерт залым ыштат. Вич миллионат 600 тӱжем теҥгем шогышо проектым федерал рӱдерат сайлан шотлен, тидын нерген тӱвыра министр Константин Иванов увертарен. Тидыже тӱвыра деке республикысе шукырак калыкын кумылжым савыраш полша. Тиде залыште концертым гына огыл, спектакль- влакымат ончыкташ тӱналыт. Кызыт тыгай йӧн дене Москошто Мариинский ден Большой театр пайдаланат. Нуно кинотеатрлаште элна да тӱня мучко шке пашаштым ончыктат. Тыгаяк сомыл республикынамат вуча. Нине проектлам ончаш кошташ лӱмын абонемент ышталтеш. Виртуал концерт зал- влакым ыштымаш «Цифровая культура» регионысо проектын ик корныжлан шотлалтеш. Тудым илышыш шыҥдараш 2024-ше ий марте чыла тӱрлӧ бюджет гыч 8 миллион утла теҥге окса ойыралтеш. Тиддеч посна Чавайн лӱмеш калыкле книгагудо Калыкле электрон книгагудыш пурташ книга-влакым цифроватлаш тӱҥалын. «Тӱвыра» калыкле проектым шыҥдарыме жапыште республикылан чот шергакан 60 книгам цифрыш кусарыме лиеш.

Марий Эл гыч кок техникум – Марий политехнический ден Строительно- промышленный-Россий туныктыш министерствын «Доступная среда» корно дене федерал субсидийым налаш ойыркалымаште сеҥышыш лектыныт. Политехнический техникум кум ий жапыште начар тазалыкан- влакым туныкташ тунемме-методик ресурс рӱдерым ышташ да вияҥдаш ныл миллионат 600 тӱжем теҥгем налшаш. А строительно-промышленный техникум 2020-шо ийыште Российысе «Доступная среда» кугыжаныш проект кышкарыште Базовый профессионал туныктышо системым ышташ вич миллионат 200 тӱжем теҥгем налшаш. Тиде окса дене инвалид да начар тазалыкан- влаклан у профессий – влакым почаш, лабораторий ден мастерской- влакым у тунемме-лабораторный оборудований дене пойдараш, чарак деч посна тунемаш йӧным ыштышаш.

Аркадий Сергеев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.