Кечым иктешлен: сӱрем тылзын 10-шо кечысе тӱҥ увер-влак

Сӱрем тылзын 10-шо кечысе тӱҥ увер-влак.

Республикысе йоча театр-влаклан у автобус деч сравочым кучыктеныт. Артист-влакын илышышт спектакль дене гына огыл кылдалтын, шуко вере гастроль дене коштман. А тидлан йӧнан автобусшо ок сите. 2017-ше ий годсек Марий Эл «Театр-йоча- влаклан» проектыш чолган ушна. Тудын кышкарыште тений республикылан 15 миллионат 600 тӱжем теҥге оксам ойыреныт. Тудлан кӧра республикысе курчак театр 16 еҥлан келыштарыме кум миллион теҥгеаш автобусым налын, Марий Самырык театр тыгаяк акаш 20 еҥ шичман автобусан лийын. У театр тургым тӱҥалме деч ончыч нине театрлан республикым вуйлатыше ГАЗель машина деч сравочым кучыктен. У машинам тений кучыкташ моткоч куанле манын тудо. Молан манаш гын, тиде идалык Театрын идалыкше семын эрта. Коллектив- влаклан тудо у сеҥымаш-влакым тыланен.

2020-шо ийым Российыште Шарнымаш да Чап идалык семын увертарыме. Россий правительствылан тӱҥ мероприятий- влакын планыштым ямдылаш кӱштымӧ. Шарнымаш да Чап идалык историй шарнымашым арален кодаш да Кугу Ачамланде сарыште сеҥымылан 75 ий темме лӱмеш эртаралтеш. Тидын шотышто Россий Президентын Указше официальный интернет-порталыште савыктыме.

Республикым вуйлатыше Александр Евстифеев таҥасаш ямдылалтше республикысе спортсмен-влак дене вашлийын. Правительстве пӧртын заседаний залыштыже самырык куштылго атлет, ийше, дзюдоист, ӱстембал теннис дене спортсмен-влак погыненыт. Вашлиймашке чылаже 51 еҥ погынен. Нунын кокла гыч 37 спортсмен да 11 тренер. Спорт туризм министр Лидия Батюкова рашемден: республикын сборный командышкыже Йошкар-Ола, Советский, Морко, Медведево да Куженер районла гыч 23 рвезе да11 ӱдыр пуреныт. Арня наре жаплан Марий Эл кугу спорт пайремын рӱдышкыжӧ савырна. Уло элна гыч кок тӱжем наре еҥ шке вийжым куатшым ончыкташ тӱҥалеш. Александр Евстифеев каласен: ӱшанем- кажныда кӱкшӧ лектышым ончыктынеже, паралимпиец лийнеже, Российын чапшым тӱнямбал ареныште аралаш шона. Мемнан команде самырык, ончыкылыкшо уло. Сай лектышыш шуаш мо кертмыжым чыла ыштеда. Спартакиада илышыштыде кугу верым налеш, у йолташ- влакым муыда. Сеҥымашым тыланем. Делегацийым вуйлатыше Кирилл Печенин ӱшандарен ойлен: ӱдыр-рвезе-влак шӧртньӧ медаль верч веле кучедалаш тӱҥалыт да ӱдыр-рвезе-влаклан тӱткышым ойырымылан да поро сугыньлан тауштен ойлен.

Аркадий Сергеев

Кидшер
Шонымашым ешараш