Кечым иктешлен: сӱрем тылзын 17-ше кечысе тӱҥ увер-влак

Сӱрем тылзын 17-ше кечысе тӱҥ увер-влак.

«Экологий» калыкле проект республикыштына вигак шӱк-куштырам ойыркалыше ныл комплексым чоҥышаш улыт. Тидыже элыштына экологий йодышым саемдаш манын ышталтеш. Ик задачыже-шкевуя чумырымо шӱк ора-влакым кораҥдымаш. Ойыркалыше комплекс-влак Шернурышто, Моркышто, Юриныште лийшаш улыт. Йошкар-Олаште кокымшо линийым чоҥаш палемдыме. Проектлан окса федерал да республикын бюджетше гыч ойыралтеш. Тичмаш кугытшо 437 миллион теҥгеш погына. 2024-ше ий марте шӱкшакын 60 процентшым ойыркалыман.

Курык марий кунемыште чолга самырык тукымын «Кравец» тӱвыра да шинчымашым пуышо форумжо почылтын. Тудо ынде кудымшо гана Кулаковы школышто погынен да 21-ше июль марте шуйна. Тушко пӱтынь Марий Эл да моло кундем гыч школышто тунемше да студент-влак толыныт. Нунылан лекций ден ӱчашен мутланымаш, йыргешке ӱстел да мастер-класс, экскурсий-влак эртаралтыт, эксперт- шамыч проектым возаш туныктат. Тыгак интернетын ончыкылыкшо, SММ, калык ончылно ойлаш тунеммаш, еш йӱлам арален кодымаш да моло темымат каҥашаш тӱҥалыт.

Эрик Сапаев лӱмеш опера да балет академический театрын артистше- влак тиде кечылаште Сочи оласе калыкым куандарат. Тусо Телымсе театрын сценыштыже «Кеҥежымсе балет тургым» фестиваль эрта. Тиде проектлан тӱҥалтышым ӱмаште пуымо. Лач марий театр тушто эн ончыч выступатлен. Тений Сочи калыклан руш балетын эн ойыртемалтше кум спектакльже ончыкталтеш: «Лебединое озеро», «Золушка» да «Щелкунчик». Марий артист-влакым тушто шокшын вашлийыт, зал эре тич темше.

Аркадий Сергеев

Кидшер
Шонымашым ешараш