«Лӱдыкшыдымӧ да сай качестван автомобиль корно-влак» калыкле проект кышкарыште Йошкар- Олаште Первомай урем олмыкталтеш. Панфилов урем деч тӱҥалын Серов урем марте кум меҥге наре кужыт корно олмыктышаш ныл корно радамыш пурен. Нуным 1-ше октябрь марте тӧрлен шуктышаш улыт. Пашам «Автодор» предприятий шукта, «Водоканал» каналаизаций да вӱдпуч люк-влакым вашталта. Корнын тиде ужашыштыже 65 люкым уэмдыман. Ондак тиде пашалан кермычым кучылтыныт гын, кызыт бетон оҥго-влакым гына шындат. Сандене капитально олмыктымо паша кая. Тидын годым пеш шуко технике кучылталтеш. 10 еҥан бригаде ик кечыште кокла шот дене кок вынемым рончен, уым шынден шукта. Нунын деч вара пашашке корно пашаеҥ-влак ушнат. Палемдыман: асфальтым волгыдо годым веле огыл шарат. Ӱлыл пачашыжым 10 шагат кас гыч 6 шагат эр марте оптат.

Республикысе МЧС-ыште пожар ваштареш кучедалше службын пашаеҥже–влак коклаште профессионал мастарлыкым тергыме конкурсым эртареныт. Шке подразделенийлаштышт сеҥыше-влак республикысе кӱкшытыштӧ таҥасеныт. Конкурс Пембе посёлко кундемыште эртен. Эн ончыч погынышо- влак теорий шинчымашыштым тергеныт. Вара шинчымашыштым практикыште ончыктеныт. Конкурсын лектышыже почеш эн сай караул вуйлатышылан специализированный пожарно–утарыше частьын дежурный сменыжым вуйлатыше Константин Паймеровым шотлымо. Эн сай пожарный лӱмым тиде часть гычак Максим Горохов сеҥен налын. Пожар охранын эн сай пашаеҥжылан Звенигово оласе 40- ше номеран частьын отделенийжым вуйлатыше Артём Ивановым шотлымо.

Спартакиаде кайыме жапыште тудын талисманже- мотор пырыслан лӱмым кычалыныт. Социал вотышто тудын верч йӱклымаш эртен. Эн шуко еҥ, 43 процент, «Йошик» верч шке йӱкшым пуэн. Тудын почеш «Спортик», «Тимошка» да «Йоко» лӱм-влак верланеныт. Йӱклымашке 700 утла еҥ ушнен. Ушештарена: тиде талисманым Йошкар-Ола гыч Вера Никитина сӱретлен.

Аркадий Сергеев

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.