Кечым иктешлен: сӱрем тылзын 24-ше кечысе тӱҥ увер-влак

Сӱрем тылзын 24-ше кечысе тӱҥ увер-влак.

Москошто паша дене улмо жапыште республикым вуйлатыше Александр Евстифеев Российысе чоҥымаш, илыме вер да коммунал озанлык министр Владимир Якушев дене вашлийын. Мутланымаште кундемым социал-экономик могырым вияҥдыме фактор-влакым каҥашыме, тӱрлӧ ситуацийым ончымо, улшо проблемым ончыктеныт нуным виктарен колтымо корным рашемденыт. Тиде темым кумданрак лишыл жапыште Йошкар-Олаште выездной заседанийыште ончымо лиеш. Тудым Владимир Якушев исполнитель кучемын федерал органжын еҥышт дене пырля эртара. Москосо вашлиймаште тиде лийшаш совещанийын кузе эртышашыжым рашемдыме. Владимир Якушев ден Александр Евстифеев тыгак кундемым вияҥдымаште чаракым ыштыше аспект-влакым ончымо, экономикым вияҥдыме тӱҥ вер-влаклан тӱткышым ойыраш да инвестицийым кондаш кутырен келшыме.

Ял озанлык пашаеҥ-влак шурно пасуш лектыныт. Эн ончыч тиде пашашке «Звениговский» СПК-ан пашаеҥже-влак ушненыт. Нуно 150 гектар кумдыкышто кокияш уржам тӱредыныт. А Курык марий районышто эр шушо пареҥге ден ковыштам погаш тӱҥалыныт. Роколмам 150 тонным лукмо, ковыштам 50 тонным руымо. Тений республикысе мланде пашаеҥ-влаклан 123 тӱжем гектар гыч пырчан да пырчан-отызан культурым поген налман, кок тӱжемат 300 гектарыште пареҥгым лукман, тӱжемат 400 гектарыште саскам погыман. Пашам кӱрылтде шукташ манын, ял озанлык техникым, коштымо да оборудованийым, пырчым, пареҥгым, саскам аралыме клатым сайын олмыктымо, йӱлышӧ да шӱрымӧ материалым шапашлыме.

Республикыштына тенийсе пелийыште тӱжемат 200 еҥ эмлыме врелашке янлык але вольык пурлмылан кӧра полышым йодын миен. Нунын кокла гыч 304-ше йоча улыт. Тидыже ӱмашсе тыгаяк жап деч 12 процентлан шукырак. Роспотребнадзор виктемын ончыктымыж почеш кажне ийын ир янлык-влакат пурлыт. Тений тыгайже кумыт лийын. Полышым йодын утларакше Волжский, Шернур, Оршанке, Морко, Марий Турек, Куженер, Курык марий да Звенигово районлаште илыше-влак толыт. Тений 7 гана орымаш черым рашемдыме-Марий Турек, Оршанке, Параньга, Шернур да Советский районлаште вич рывыж да кок пий черланен, 352 шала коштшо пий ден пырысым кучымо. Эпидемиолог-влак темлат: янлык пурлмеке, сусыр верым вигак яндар вӱд да шовын дене мушман, тӱржым спирт але йод дене йыгыман да юватылде медицина тӧнежыш кайыман.

Аркадий Сергеев

Кидшер
Шонымашым ешараш