Сӱрем тылзын 29-ше кечысе тӱҥ увер-влак нерген «Кидшер» интернет-журнал палдара.

Кресаньык озанлык-влаклан полыш

«Изи да кыдалаш предпринимательстве да амалкалче тӱҥалтышлан полшымаш» калыкле проект дене келшышын, республикысе ял озанлык министерствыште кресаньык озанлыкым ышташ да вияҥдаш «АгроСтартАп» грантым налаш конкурсышто сеҥыше-влаклан субсидийым пуаш соглашенийым пеҥгыдемдыме. Конкурсын лектышыже почеш Параньга, У Торъял, Шернур, Куженер да Советский районла гыч вич кресаньык (фермер) озанлык сеҥышыш лектын

У ийлан

Республикысе школ-влак у тунемме ийлан ямдылалтыт. Ведомство-влак кокласе комиссий куд районышто тунемме вер-влакым принматлыме сомыл мучашлалтын. Чылаже 145 школым тергыме але уло школ гыч 58 процент лиеш. Тений 253 школ пашам ышташ тӱналеш. Тушто 79 тӱжемат 475 йоча шинчымашым пога. Кызыт леведышым олмыктат, котельный-влакым йӱштӧ жаплан ямдылат, инженер коммуникацийым тергат. Курык марий, звенигово, Килемар, Марий Турек, Медведево, У Торъял да Юрино районысо школлаште 10 спортзалым икымше сентябрьлан олмыктен, спорт оборудований дене пойдарышаш улыт. Тыгак школласе кочмыверым материально-технически пойдарыме, йоча-влакым пукшымым саемдыме шотышто паша шукталтеш, медицина кабинет- влакымат олмыктат.

Бизнеслан полыш

Республикысе экономически вияҥмаш министерстве пеленысе общественный советын черетан заседанийже эртен. Тушто «Амалкаче пашам виктарыме йӧным саемдымаш», «Изи да кыдалаш предпринимательствылан окса дене пайдаланыме йоным кумдаҥдымаш», «Изи да кыдалаш предпринимательствым кугемдымаш» регионысо проект-влакым шыҥдарыме йодышым каҥашыме. Тыгак экспорт дене кылдалтше, паша лектышым кугемдыме теме-влакым лончылымо. Микрокредит компаний негызеш предпринимательстве субъект-влаклан полышым пуымо, «Мыйын бизнесем» рӱдерым ыштыме, экспортлан полшышо рӱдерым вияҥдыме нергенат ойлымо.

Аркадий Сергеев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.