Кече кечым покта, арня – арням. Тыге мландымбаке шыже пагыт толын шуо. Марий-влак пакчашкышт кушшо поян саскам, пасушто кӱын шушо киндым поген налыт. Ты пагытлан кайыквусо ден вольыкат атыланен шуэш. Шыжым йӱд кече деч кужурак лиеш, суткан волгыдо жапше эркын колташ тарвана, Ош Кугу Юмылан тауштен, умбакыжат илыш тыныс да пиалан лийже манын сӧрвала. 

Кумалаш тарваныше калык кумалтышыш лекташ кутырен келша, тидлан лӱмын кечым палемда, могай вольык дене кумалаш каҥаша. Кумалтыш кече деч ончыч кумалме верым эрыктат, пум ямдылат, шагым келыштарат. Тӱҥ кумалтыш киндым ышташ, пурам шолташ посна ешым ойырат.

Кумалтыш кечын осыгечынже, мончашке пурат, сортам пӱтырен ямдылат, неран киндым, мелнам кӱэштыт, мелна кышыл ӱмбакыже туарам пыштат. Кӱсотышко пелен наҥгаяш яндар вӱдеш мушмо ший оксам, у солык ден шовычым ямдылат. Кӱсото тӱрышкӧ миен шогалмеке, вуйым савен, Кӱсотӱмал Юмо дене саламлалтыт, кумалме кечым пореш ужаш йодыт. Кӱсото кӧргыш пурымеке, кӱлеш сомылым шуктат, кумалме верыште кумалтыш вий дечын кугу шулыкым, кум тӱрлӧ кӱрылтдымӧ перкем, серлагыш ден аралтышым йодын сӧрвалат, вара тауштен, мӧҥгышкышт каяш тарванат.

Тиде кумалтыш кече деч вара кумалме арням сайын жаплен шогат. Оксам шагал кучылтыт, вургемым огыт мушкеде, вӱрым луктын, вольык шӱшкылмашым огыт ыште, шкеныштым шыман кучат, пытартыш кечынже арня лектышым палемден кумалыт.

Тыгай кумалме йӱла кугезына-влак деч курымла дене куснен толын, меат тудым ончыкылык тукымланна арален кодышаш улына, — воза «Марий юмынйӱла да пайрем-влак» книгаште В.Мамаев.

Марий юмынйӱла ушемын палдарымыже почеш кумалтыш-влак эртат:

29 сентябрь — Советский район Яҥгранур, Пибахтин почиҥга, Шуймучаш, Кукмарий, Ваштаршӱ ял-влакын кумалтышышт эртен;

3 октябрь — Советский район Кугунур ял;

6 октябрь — Советский район Кундышӱмбал ял,
Марий Турек район Кӱшыл Турек,
Йошкар-Ола,
Пошкырт кундем Янаул район Комбо ял,
Моско ола,
Угарман кундем Тоншай район Ошкаты ото,
Советский район Тапшер кундемыште 3 тулолмо дене мер кумалтыш.

13 октябрь — Марий Турек район Турек Суртан,
Кужэҥер район Шинур ял кумалтыш-влак.

27 октябрь — Марий Турек район Кӱшыл Мосара ял,
Кужэҥер район Эҥервал кӱсотылашке кумалаш лектыт.

29 октябрь — Кужэҥер район Шойдӱҥ ото.

3 ноябрь — У Торъял район Саваран отышто Тӱня кумалтыш,
Марий Турек район Арбор кундем.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.