21 июньышто Йошкар-Олаште марий калыкын ик эн вучымо да йӧратыме пайремже – Пеледыш пайрем эртыш. Тышке Марий Элын чыла районжо гыч да марий-влакын илыме моло кундем гыч калык погынен.
Пайрем мероприятий Йошкар-Оласе Тумер отышто индеш шагатлан тӱҥалын. Тыште Агавайрем эртен. Тиде жапыштак Рÿдö паркыште кудо-влакым (уна пӧртым) вераҥдаш тӱҥалыныт. Тыште гын, декоративно-прикладной усталыкын мастарже-влак шке ӱзгарыштым, районласе производитель-влак сатуштым ужалымашке луктыныт. Уна пöрт-влак коклаште «Кудо» конкурс эртен. Эн сай «Кудо» конкурсышто Кужэҥер районын кудыжым шотлымо.
Чыланат тӱрлӧ сынан марий тувырым чиен лу шагатлан Ленин лӱмеш тӱвыра полат ончылно Йошкар-Оласе да республикысе районла гыч усталык коллектив-влак, мер организаций да калыкле-культур объединений-влакын еҥышт погыненыт. Пайрем колонно дене Ленин проспект мучко Ленин лӱмеш площадьыш ошкылыныт. 12 шагатлан «Пеледыш пайремым» почмо торжественный церемоний да театрализоватлыме представлений эртеныт. Пайремышке калыкым Марий Эл Республик вуйлатышыже Леонид Маркелов саламлаш толын.
Варажым пайрем колонно Комсомольский урем дене Рÿдö паркыш тарванен. Программе дене келшышын кечыгут Рÿдö паркыште, Чавайн бульварыште да Никонов площадьыште тӱрлӧ мурымаш-куштымашан, модман, йоча да спорт мероприятий-влак эртаралтыныт.
Пайремышке у проектым «Саскавий» марий ӱдырамаш ушем пуртен, «Мелна пайремым» эртарен. Чылажге 13 участник лийын, 30 утла тӱрлӧ мелна калыклан темлалтын. Чыла участник-влакым шергакан пӧлек дене палемдыме.
Каласен кодыман, Ленин лӱмеш площадьыште, икымше гана «Марла йыр куштымаш — 2014» эртен. А «Пеледыш пайрем» Ленин площадьыштак этнодискотеке дене мучашлалтын. Касым марий эстрадын шÿдыржö-влак сӧрастареныт.
Мутат уке, «Пеледыш пайремын» организаторжо-влакымат каласен кодыман: Марий Эл Республикысе тӱвыра, печать да калык паша шотышто министерстве, Туныктыш да шанче министерстве, Мер Каҥаш, Марий калык конгресс, Марий Эл Радио, Я.Эшпай лӱмеш Марий кугыжаныш филармоний, М. Шкетан лӱмеш Марий кугыжаныш драме театр, Республикысе марий тӱвыра рӱдер, И. С. Палантай лӱмеш Марий республикысе тӱвыра да сымыктыш колледж, Йошкар-Оласе тӱвыра управлений, «Саскавий» марий ӱдырамаш ушем.
Вес ийын Пеледыш пайрем 20 июньышто лиеш.
