У марий фильмымын съёмкыжо-влак эртат!

Ӱмаште «Марикино» киностудий «Ял ӱмбалне мужыр йӱксӧ» лӱман марий фильмым возен да калык коклаш луктын ыле. Ынде икмыняр тылзе тиде диск «Марий пӧлек» киосклаште ужалымаште уло.
Тачысе кечылан «Марикино» киностудий у фиьмым ямдыла. Фильмлан сценарийым драматур да актрисе Зинаида Долгова возен. Режисер Олег Иркабаев фильмым луктымаште тырша. Фильмлан эн ондак индешымше февральыште Руш драмтеатрыште кастинг эртен, эн сайже-влак фильмыште модаш тӱҥалыт. Тыге Оксинан рольжым — Марий Элын сулло артисткыже Марианна Сильвестрова, Тачанан рольжым — Марина Почтенева, Ольошын койышыжым — Евгений Ибраев, Петюн рольжым — Артём Иркабаев, Сапанын — Андрей Бусыгин, Андрэн рольжым — Марий Элын сулло артистше Сергей Мамаев. Нуно чыланат «Олманурын оръеҥже» кином сӧрастарат. Кызыт съёмко-влак эртат. Икымше фильмым Кужеҥер районысо Йывансола ялыште эртен гын, кокымшо Морко районысо Нурӱмбал ялыште, Йошкар-Олаште эртат. «Марикино» студийын пашаеҥже-влак фильмым У ийлан ышен шукташ шонат.