Самырык рвезе — сайтын редакторжо!

«Кидшер» сайтыште марий тӱня дене кылдалтше шуко уверым лудаш лиеш. Ты сайт шукерте огыл шочын гынат, калыкыште кумдан шарлен. Тудын редакторжо – самырык рвезе Николай Любимов.

Николай У Торъял район Элеволко ялеш шочын-кушкын. 9-ше класс марте Токтарсола школышто тунемын, вара Советский район Ӱшнӱр кыдалаш школышто. Кызыт кугыжаныш экзамен-влакым куча.

Рвезе кок ий наре марий йылме дене блогым вӱда. «2012 ийыште Токтарсола школышто Российысе марий самырыктукымын слётшо эртен. Тушто марий шӱлышан ӱдыр-рвезе-влак дене палыме лиймеке, чонем шулдыраҥмыла лийын, калыкемлан пайдам кондымем шуын да марий блогым ышташ шонымаш лектын. Интернетыште шуко кӱлеш-оккӱл увер уло, но марий сайт да блог шагал, адакшым марий калыкын йылмыже, тӱвыраже, историйже поян да оҥай. Нунын дене вес калыкымат палдарыман. Садлан чылан умылышт манын, блогышкем статья-влакым марла да рушла возкалаш тӱҥалынам. Тиде шкешотан интернет-дневникыште кажне еҥ шуко оҥай да кӱлеш уверым муын кертеш. Блогым «Илыш ик гана веле пуалтеш» лӱмденам, — ойла рвезе. – Но ик блог дене серлагаш ыжым шоно. У марий сайтым ыштымем шуын. Тидын нерген икмыняр еҥ дене кутыренам. Чаманен каласыман, нуно пашаштлан пеш шуко оксам йодыныт. Сандене сайт нерген жаплан мондаш логалын. Икана Ӱшнӱр школышкына компьютер лингвист Андрей Чемышев толын. Мый тудлан сайт нерген шонымашем ойленам. Андрейлан оҥайын чучын. Пел ий наре у проектым ямдыленна. Тыге тений февраль гыч «Кидшер» этнокультур сайт шочын. Кумылан-влак https://kidsher.ru/ адрес дене ончен кертыда. Сайтна марий калыкын илыш корныжо, тӱвыраже, йӱлаже нерген кумдан да келгын палдара. Тушто финн-угор калык-влак нергенат ятыр статья уло. Сайт тичмашнек марий интерфейс дене пашам ышта. Тӱҥалтышыште «Кидшерыш» шке возенна, а кызыт материалым марий журналист, мер пашаеҥ, тӱвыра аланыште тыршыше, туныктышо, тунемше-влак темлат. Молан «Кидшер»? Руш йылмыш кусараш гын, тиде шомак «пульсым» ончыкта. Сайтыштына марий калык дене кылдалтше чыла событий дене палдарена. Уверым писын пуаш тыршена. Марий йылме да интернет нерген шонкалымаш статьям, лӱмлӧ еҥ-влак дене интервьюм, видеом, мурым, почеламутым да тулеч молымат сайтыште муаш лиеш».

Тиде интернет-журналым вияҥдаш журналист, программист да кок филолог полшат. «Чыланат кыртмен пашам ыштена. Марий улмына дене кугешнена, шочмо йылмынам моктена да аклена, молымат тидлан туныктена, — манеш рвезе. — Ушышто шуко шонымаш пӧрдеш. Тудым шыҥдараш жап да тӱрлӧ ушемын полшымыжо кӱлыт. Оҥай акций, конкурс, концерт программе-влакым эртарынена. Тыге марий койыш дене илаш туныктена. Пашана арам огеш ышталт, шонем. Воктенет умылышо, полшышо еҥ-влак улыт гын, чылажат куштылгын ышталтеш, вий-куат ешаралтеш. Школышто тыгай полышым туныктышо-влак пуэныт. Поснак кугу таум Ӱшнӱр кыдалаш школ вуйлатыше Валерий Федорович Галкинлан, марий йылме ден литературым туныктышо Зинаида Александровна Волковалан, директорын инновационный паша шотышто алмаштышыже Елена Геннадьевна Муржаковалан да руш йылмым туныктышо Антонина Васильевна Васильевалан каласынем». Яра жапыште рвезе марий мурым колышташ йӧрата, шкежат мура, мурызо да ансамбль-влак дене пырля концерт дене тӱрлӧ районыш лектеш. «Лӱмлӧ, чолга еҥ-влак дене кутыраш келша. Нунын дене мутланен, пайдам налам, шукылан тунемам. Ме, самырык-влак, кугурак-шамычын ойыштым ушыш пышташ да кушкын толшо тукымлан шыҥдарышаш улына. Тек марий йылме Марий кундемыштына веле огыл, тӱня мучко йоҥга», — каласыш блогер.

 Анастасия Эманова.

Кидшер
Шонымашым ешараш