Кажне ӱстембалне мӱй лийже!

Мӱкшызӧ, мӱй, мӱй спасТолшаш рушарнян, 14 августышто мӱй спас палемдалтеш. Ондак лач ты кече гыч мӱйым кочкаш тӱҥалыт. А мӱӥ тазалыклан моткоч пайдале. Но мӱкшым ончымо пашажат куштылго огыл. Мӱкш пелен шкеат мӱкш гай лийман: омартам, рамым ситышын ямдылыман, карашан рамым аралаш верым ситарыман. Калыкыште ойлат: «Мӱкш — «юмын кайык», мӱй — чыла чер деч эм». Чын, мӱкш лым лийде эре пашам ышта, ик пеледыш гыч весыш пырчын-пырчын нектарым поген чоҥештылеш. Шоналташ гын, ик изи совла мӱйлан мӱкшлан мыняр гана омарташ чоҥештылашыже логалеш? Шуко. 
Мӱкш-влак тӱрлӧ верыште мӱйым погат тӱрлӧ таман мӱйым кочкаш лиеш, тугеже, мӱкш пеледыш гыч гына огыл мӱйым пога. Могай тӱрлӧ мӱй уло? Интернетышке ончаш пурышна. Чылажге, нылле кум тӱрлӧ мӱй сортым шотлышна. Мутлан: писте, акаций,  шемшыдаҥ (гречке), эҥыж, барбарис, лопшудо, васильёк, тыкве, мелисе, мяте, пустырник, пызлыгичке, мото, шалфей эсогыл кешыр мӱй-влакымат тамлен ончаш лиеш.
Специалист-влакын ойлымышт почеш, мӱйым изижланат-кугужланат кочман. Тудо вий-куатым да чонланат ласкалыкым пуа.  Мӱйын составше: фруктозо – 36 %, глюкозо – 32 %, сахарозо – 2 %, мальтозо — 8 %, вӱд – 20 %. Углеводлан поян улмыжлан кӧра мӱй виян энергетический кочкышлан шотлалтеш.  Сандене, мӱй физически пашам ыштыше еҥ, спортсмен-влаклан пеш пайдале лиеш. Чайым йӱымо годым сакыр олмеш мӱйым кучылташ темлена. Тунам эре таза лийыда. Мӱйын качествыже мӱкш, пеледыш деч гына огыл шога, тыгак, мӱкшызӧ-влак шке сомылыштым сайын палышаш улыт. Ме гын, тыланда мӱйым кевытыште огыл, а пазарыште (южгунам тыштат мӱй сай лиеш), мӱкшызӧ-влак деч налаш темлена. Вет пытартыш жапыште, оксам шуко ыштен налаш манын, мӱй нерген тӱрлӧ шоя уверым кучылтыт.

Иван Речкинын фотожо

Кидшер
Шонымашым ешараш