Марина Садова – ынде икмыняр ий сылне деч сылне муро-влакым йоҥгалтара. Шукерте огыл самырык мурызо «Ом мондо тыйым» мурыж дене «Марий Эл Радион» индеш ияш концертыштыже калык ончыко лектын да шукыштлан вигак тиде муро келшен шинчын.
Марина шкеже Медведево районышто шочын, кызыт Оршанке район, Кугунур селаште ила. Тиде кеҥежым ӱдыр И.С. Палантай лӱмеш республикысе тӱвыра да сымыктыш колледжыш, эстраде отделенийыш, тунемаш пурен.
Марина мурым ныл ияшак мураш тӱҥалын, а индешымше класс гыч профессионально мураш тунемеш. Тачысе кечылан Маринан репертуарыштыже «Шыже», «Рвезе пагыт», «Йылдыр-йылдыр», «Пырля она лий нигунам» муро-влак улыт. А «Ом мондо тыйым» мурым Маринан йӧратыме да пагалыме туныктышыжо-влак Рыбакова Елена Сергеевна ден Кудрявцева Римма Алексеевна пӧлекленыт. Каласен кодыман, «Шулдыран муро» да «Марий лӱм» муро-влакым Мариналан нунак возеныт.
«Ом мондо тыйым» муро икмыняр концертыште йоҥгалтын. Марий Эл Радион колыштшыжо-влакат Маринан мурымыжым йӧратат. Тек тыгай мотор да сылне муро-влак шуко деч шуко шочыт!
А ме тыланда Марина Садован «Ом мондо тыйым» мурыжым, мурын мутшым да «Марий Эл Радион» индеш ияш концертыште йоҥгалтарыме видеом ончаш да колышташ темлена.

Марина Садова — Ом мондо тыйым

Мутшо: Р. Кудрявцеван. Семже: Е. Рыбакован.

1. Вашлийынна коктын ик кастен,
Пиал шинчаштына чӱчкен.
Киднажым кидышке кучен,
Кок шӱм чыла йырваш монден.

Припев: А лум велеш , велеш, велеш, велеш
Мемнан кышанам йӧршын леведеш,
Но тый кодат лач мыйын ушыштем,
Ом мондо тыйым, мый палем.

2. Каваште шӱдыр-влак йӱлен,
Мемнам онченыт кӧранен
Кок кӧгӧрченла йӧратен,
Ме ваш онченна ӱшанен.

Припев: А йӱр йӱреш, йӱреш, йӱреш, йӱреш,
Мемнан кышанам йӧршынак мушкеш,
Но тый кодат лач мыйын ушыштем,
Ом мондо тыйым, мый палем.

3. Чон ныжыл семым куанен
Моштен онал ме арален,
Ок кӱл ты верчын ойгыраш
Кодеш кокланже шарналташ.

Припев: А лум велеш, велеш, велеш, велеш
А йӱр йӱреш, йӱреш, йӱреш, йӱреш,
Но тый кодат лач мыйын ушыштем,
Ом мондо тыйым, мый палем.

3 КОММЕНТАРИЙ-ВЛАК

  1. Маринан мурымыжым, ныжыл йӱкшым пешак йӧратем. Ончылныжо тудым кугу сеҥымаш вуча, очыни. Эн пиалан ӱдыр лий.

  2. Пеш сылне муро! Пеш кугу автор, мурызо да «Кидшер» интернет-журналлан…

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.