О порын толын шогыжо Ош Сандалык Юмынан У идалыкше!

Тӱня кумалтыш

Марий калыкым, У ий дене Тӱҥ онаеҥ Александр Таныгин саламла.
О порын толын шогыжо Ош Сандалык Юмынан У идалыкше! Ужар шаган кожет дене, тичмаш кинде-шинчалет дене, эртен кайыше идалыклан тыныс-ласка илышым пуымыжлан ме порын вуйнам савена, таум ойлена. 
О поро дене вашлийышт У идалыкнам мемнан Пӱрышына, Мер Кугу Юмына! Йӱла дене йӱла, тӱс дене тӱс, йылме ден йылме коклаште пуэн шогыжо мыланна поро деч поро шулыкым, аралтыш серлагышым, илыш кумылланна пиалым.
Иза-шольо, ака-шӱжар, тулар-тулаче-шамыч! У идалык аҥаште еш кышкарда тӱлянен тичмашын шогыжо, сурт-печыда уэмдалт нӧлталтын шогыжо, ӱстембал чесда эре пургыжалт шогыжо, вольык йӱк-йӱанда чон кӧргыдам куандарен шогыжо, мӱкш отарда шем пыл гай нӧлталалт шогыжо, мӱй клатда саска пуш дене ӱпшалт шогыжо.
У ий дене! У вий дене! Эсен, тазан шогыза!

Саламлымаш дене, Тÿҥ Онаеҥ Александр Таныгин.

Кидшер
Шонымашым ешараш