«Кидшер» интернет-журнал у вийым налеш!

Кок тӱжем латкумымшо ий мучаште «Кидшер» интернет-журналлан негызым пыштыме ыле. Жап эртен, тачысе кечылан марий интернет-кышкарыште «Кидшер» ончыл верым налын шога, манына гын, йоҥылыш огына лий, очыни. А эртыше ий, кок тӱжем латнылымше ий могай событийлан, пашалан поян лийын? Лачшымак, жап эртыше идалыкым иктешлаш.
Кок тӱжем латнылымше ий Марий Эл Республикын да уло элнан историйыштыже Тӱвыра идалык семын кодеш. Эртыше идалыкыште тӱвыра тематикылан шуко мероприятий эртаралтын.  «Кидшер» интернет-журнал чыла огыл гынат, эртыше событий-влак нерген шке лудшыжо да ончышыжо-влаклан эреак каласкален шоген.
«Кидшер» интернет-журнал «Марий улмем дене кугешнем» конкурс, «Кидшер этнокультур сайт дене пырля», «Книга — яллан»  акций да тӱрлӧ мероприятий-влакын организаторжат лийын. Лишыл жапыште ме тендам эше ятыр оҥай проект-влак дене куандараш ямдылалтына.
Конкурсым, акцийым да мероприятийым эртарыме-влак деч посна «Кидшер» интернет-журнал шке вийжым тӱрлӧ конкурслаште тергаш тырша. Мутлан, Марий Эл Республикын тӱвыра, печать да калык-влакын паша шотышто министерстве «Марнетын шӱдыржӧ — 2014» конкурсым эртарен ыле. Тушто вийжым мемнан сайтнат терген ыле, но чаманен каласаш логалеш, сеҥыше-влак радамышке лектын кертынна огыл. Туге гынат, ме сайтым тӱрлӧ конкурс-влак верчын ыштенна огыл, а калык марий йӱланам, тӱвыранам, йылмынам йӧратыже да пагалыже амал дене ыштен улына.
Идалык жапыште «Кидшер» сайт койынак вашталтын. Сайтлан мотор, сылне, тачысе кечылан келшен толшо шаблоным ыштен улына.  Куандара, кок тӱжем латнылымше ий сентябрь тылзе гыч «Кидшер» интернет-журналын руш версийжым лудаш лиеш. Тудо www.kidsher.ru/ru адрес дене верланен. У ий пайрем-влак жапыште у баннер-влакым вераҥденна. А лишыл жапыште у рубрике-влакым пашашке колташ шонымашна уло.
Эртыше ийыште пашаче ешышкына у еҥ-влак ушненыт. Ме нуным изи кайык семын эше «чоҥештылаш» гына туныктен шогена, лишыл жапыште те нунын дене палыме лийыда.
А пытартышлан «Кидшер» интернет-журнал дене пеҥгыде кылым кучышо еҥ-влаклан кугу таум ойлынена ыле. Мемнан пашаштына калык дене пеҥгыде кылым кучымаш эн тӱҥ.

Пагален,  «Кидшер» интернет-журналын пашаче коллективше

Кидшер
Шонымашым ешараш

  1. Александр Иванов

    Шукертсек тыгайым вучымо. Тау!

    Ответить
  2. Валентин Гвоздев

    Вучен кодына!

    Ответить
  3. Валентин Гвоздев

    Поро кече лийже, пагалыме «Кидшер»! Вот мый ончем, шуко марий еҥ тӱрлӧ сайтыште марий шрифтым возен огеш керт. Калыкым тидлан туныктеда гын, пеш сай лиеш ыле. Интернетыште программе пеш неле, кленча деч посна умылаш огеш лий.

    Ответить
    1. viktaryshe автор

      Поро жапда лийже Валентин. Тендан темлымашда почеш, лишыл жапыште сайтыште тиде да моло сынан материал-влак лектыт.
      Пеш кугу тау, «Кидшер» сайтым аклымыланда!

      Тендам пагален, Николай Любимов!

      Ответить