Андрей Котляров: Фотографий — мыйын пӱрымашем!

Эше йоча але рвезе пагыт годымак кажне самырык еҥ шканже келшыше пашам ойырен налеш. Икте сӱретлаш мастар, весе спортышто чолгалыкым ончыкта, а кумшын фотографийлан шӱм-чонжо кумылан. «Кидшер» интернет-журналын тачысе унаже – Андрей Котляров.
Андрей Йошкар-Олаште шочын-кушкын. Тӱҥ шинчымашым налмек, Йошкар-Оласе строительный техникумыш тунемаш пурен. Техникум деч вара Андрей МОСИ-шке кӱшыл шинчымашым налаш пурен. Тунемме жапыштше «Марий Эл» Кугыжаныш теле да радио компанийыште пашам ыштен. Кызыт гын, «Декорико» компанийыште пашам тырша. Андрей дене икмыняр шомакым вашталтышна. 
— Андрей, кузе тый фото деке шӱмаҥынат? Могай амал лийын? Молан лачшымак фото а вес паша огыл?
— Фото деке изем годымак шӱмаҥынам, но 17-ым ияш годым, тиде чотак палдырнен. Тунам мылам ачам ден авам фотоаппаратым пӧлекленыт. Мыланем чылажат пеш оҥай лийын. Фотоаппарат дене уремыште снимке-влакым, фотосӱрет да портрет-влакым ыштылынам, шуко фото нерген литературым лудынам. А икмыняр жап гыч кугу фотосессийымат ышташ тӱҥалынам. Фотографий тиде мыланем айдемын илышыштыже оҥай, чонеш кодшо событийым фотосӱрет гоч арален кодымаш.
— Юрист кузе телеоператорлан пашам ышташ тӱҥалын?
— МОСИ-шке мый заочно тунемаш пуренам. Сессий ийлан кок гана гына эрта. Санденак шкалан ала-могай гынат пашам муаш кӱлын. Тусо жаплан мый сӱаным, да тӱрлӧ программе-влакым видеышко войзенам. А ик гана пашаште лийме годым, мыланем телеоператор семын «Марий Эл» теле да радио компанийыште шкендым терген ончаш темленыт. Изиш шоналтымек, келшымашым пуенам.
— Телеоператор ден фотографын пашаже ойыртемалтыт мо? Могай йӧсылык икгайлык палдырна? Можо тылат лишылрак?
— Нине кок направленият чак кылдалтше улыт. Фотографын цельже кадырым жапыштыже ыштен шукташ, а телеоператорын — тиде событийым камерышке возаш. Фотограф семын ыштыме паша опытем, мыланем телеоператорлан ышташ пешак полшен. Операторлан пашам ышташ пеш оҥай: кажне кечын эн икымше у уверым пален налат, у еҥ дене палыме лият.
Фотографий — мыйын пӱрымашем. А видео — йӧратыме пашам лийын.
— Могай фотосӱрет-влакым ышташ йӧратет?
— Фотом ыштыме годым мыланем архитектур, пӱртӱс лишыл улыт. Тидын годымак тӱрлӧ стиль дене фотосессийымат ыштылаш йӧратем. Шке пашаштем у технологийым эреак шыҥдараш тыршем.
— Андрей яра жапыште фотографий деч посна тый мом ышташ йӧратет?
— Эзотерике дене литературым лудаш келша. Його клубышко коштам, сноуборд дене мунчалтем. Тылеч посна тӱрлӧ кундемлаште канаш йӧратем. Кажне ийын оҥай элыште лияш тыршем. Крым, Турций, Египет, Индий, икманаш шокшо эллаште. Тӱрлӧ калыкнан сымыктыш ден тӱвыражым пеш йӧратем. Эреак тоштерыш але галерейышке кошташ тыршем.
— Андрей, самырык фотограф-влаклан мом тыланен?
— Айдеме фотографий дене пашам ыштынеже гын, тудын кумылжо гына лийже. А эн тӱҥжӧ тиде пашам кудалташ огеш кӱл.
— Пеш кугу тау!

Николай Любимов мутланен.

Кидшер
Шонымашым ешараш