1915 ийыште 4 февральыште «Война увер» икымше марий газет лекташ тӱҥалын. Марий калыклан шочмо йылме дене возымо тиде савыктыш просветитель, литератор, этнограф Павел Глезденёвын тыршымыжлан кӧра ош тӱням ужын. Эртыше 100 ий жапыште газет тӱрлӧ лӱм дене лектеден шоген: «Война увер», «Ӱжара», «Йошкар кече», «Марий коммунист», «Марий комуна», а 1991 ий гыч «Марий Эл» лӱм дене палыме улеш.
Чынжымак, «Война увер» але «Марий Эл» газет кушкын, вияҥын, шуко шке лудшыжым поген. Каласен кодыман, интернет полшымо дене «Марий Эл» газетым тӱня мучко лудын кертыт.
Лӱмгечылан пӧлеклалтше «Марий Эл» газетын коллективше ятыр мероприятийым эртараш палемден. Теве теҥгече Марий самырык театырын сценыштыже В. П. Лазарев лӱмеш «Морко сем» академический калык хорын концертше дене «Марий Эл» газет шке шӱдӧ ияш лӱмгечыжым палемдаш тӱҥале.
Касыште Марий Эл Республикысе тÿвыра, печать да калык-влакын пашашт шотышто министр Михаил Васютин редакций пашаеҥ Анатолий Титов, Марина Тимофеева, Эльвира Казакова, Лариса Иванова, Алевтина Байковалан чап кагазым кучыктен. Россий Федераций Советын Кугыжаныш Думын Еш, ӱдырамаш ден йоча-влак йодыш шотышто комитет председательын алмаштышышже, «Единый Россий» фракцийын членже Лариса Яковлева газетын журналистше Светлана Пехметовам, Светлана Белковам, Денис Речкиным палемден.
Варажым «Морко сем» академический калык хорын концертше тӱҥалын. Программыште кумдан чапланыше марий муро-влак йонгеныт. Касышке толшо ончышо-влак сай, поро а эн тӱҥжӧ марий шӱлыш дене каеныт.
Палемдем, «Марий Эл» газетын лӱмгечыжлан пӧлеклалтше мероприятий-влак идалык жапыыште эрташ тӱҥалыт.
«Марий Эл» газет лӱмгечыже вашеш йодышмашым эртарен ыле. «Марий Эл» газет нерген Советский районысо Ӱшнур национальный кыдалаш школ директор, «Мер каҥашын» еҥже Валерий Фёдорович Галкин тыгерак каласыш:
««Марий Эл» газетым тӱҥалтыш классыште тунемме жап гычак лудын шогем. Лудмо стаж кугу – 50 ий. Кажне номерым тӱткын эскерем. Школ библиотекыш подпискым ыштенна. «Марий Эл» газет – марий еҥын тӱҥ газетше. Ятыр уверым, калыкнан тале, мастар еҥже, самырык тукым кокла гыч чолгаракше-влак нерген материалым ме лачак тыште муына. Сылнымут идалыкыште тудо эшеат кӱлешан. Икымше марий газетын 100 ий ончычак шочмыжым жапленак «Марий Эл» газетым кажне марий лудшаш. »
«Кидшер» интернет журналын увер служббыжо;
Д. Речкинын, М. Скоболевын фотосӱретышт;