Эртыше кечылаште Марий Эл Республикысе тÿвыра, печать да калыкле паша шотышто министерствын конференц-залыштыже «Саскавий» марий ӱдырамаш ушемын иктешлыме погынымашыже лийын. Погынымашыште Марий Турек, Кужэҥер, Шернур районла да Йошкар-Оласе пӧлкан еҥже-влак вашлийын, ыштыме пашам иктешлен каҥашеныт.
Ушемын ончычсо председательже Ираида Степанова 2 ий жапыште ыштыме паша нерген отчётым ямдылен. Тудын алмаштышыже Маргарита Тойшева «Ӱдырамаш да пеледыш» конкурс нерген каласкален. Йоча-влак дене пашам ыштыме шотышто Людмила Кошкина, а самырык-влак дене паша нерген Галина Шкалина увертареныт. Эльвира Куклина «Марий сандалык» журналыште «Саскавийын» лаштыкше нерген каласкален гын ревизионный комиссийын пашаж дене Зинаида Александрова палдарен.
«Саскавий» ушемын 2 ияш пашажым сайын шотлымо.
Тыгак тиде вашлиймаште Михаил Васютин, Лариса Яковлева, Анатолий Иванов лийыныт да мутланымашке ушненыт. Палемден кодыман, Римма Катаева, Елизавета Коновалова, Надежда Казанцева кызытсе саманысе пӱсӧ йодыш-влакым нӧлталыныт. Поснак марий йылмым туныктымаш шотышто йодышым республик кӱкшытыштӧ каҥашыман, манын ойленыт. Нунат «Саскавий» ушемын ончычсо пашажым сайлан шотленыт.
Марий Эл Республикысе тӱвыра, печать да калыкле паша шотышто министерствын таумутшым мер пашаште чолган тыршымылан да тӱвыра пашашке надырым пыштымылан Светлана Конышевалан да Маргарита Тойшевалан кучыктеныт.
«Саскавий» ушемын таумутшым Нина Орман, Мардан Рая, Елизавета Коновалова, Роза Рябцева, Любовь Крюкова, Ольга Майкова да Эльвира Куклина налыныт.
«Саскавий» марий ӱдырамаш ушемын у вуйверышкыже 9 еҥым пуртымо. Председательлан Людмила Кошкинам сайлыме.
