7 февральыште «Саскавий» марий ӱдырамаш ушем 2014 ийысе пашажым иктешлыш. Тудым кугу научно-практический конференций семын эртарыш. Лӱмжӧ – «Ӱдырамаш XXI курымышто». Конференций тӱҥалтыште Россий Федераций Советын Кугыжаныш Думын Еш, ӱдырамаш ден йоча-влак йодыш шотышто комитет председательын алмаштышыже, «Единый Россий» фракцийын членже Лариса Николаевна Яковлева кызыт шуктымо пашаж дене палдарыш.
Шуко тургыжландарыше йодышым тарватыме республикысе тазалыкым аралыме шотышто министерствын йочам да ава-влакым аралыме шотышто пӧлкажым вуйлатыше Надежда Илариевна Фролова дене пырля. Черле йоча шочмо, ава-влакын тазалыкышт могайрак улмо, азам кудалтымашым мӧҥгешташ тыршыме дене пырля эше ик увер ӱдырамаш-влакым шонаш таратыш. «Республикыште ийготыш шудымо (!) 27 ӱдыр йочам ыштен», — йоҥгалте республикысе калыкым социал аралыме да паша министерствын специалистше Валентина Логиновна Арсланован докладыштыже. – «Нунын кокла гыч 21 удыр марлан кайыдыме». Сандене ача-авалан, туныктышо-влаклан утларак умылтарымаш пашам наҥгайыман ешыште, тунемше-влак коклаште. МарГУ-н доцентше Маргарита Нифонтовна Кузнецова Европо кӱкшытыштӧ марий ӱдырамашым кузе аклыме нерген каласкалыш.
Ме, марий ӱдырамаш-влак, скромный, ушан, арулыкым эскерен моштышо улына! Иктешлымашым «Саскавий» марий ӱдырамаш ушемым вуйлатыше Ираида Александровна Степанова ыштен.
Автор: Анфиса Эманова. Э. Терентьеван фотожо.