Тиде ийын икымше гана марий мер толкынын самырык активистше-влак, Марий Эл Республикысе тӱвыра, печать да калык-влакын пашашт шотышто министерствын конференций-залыштыже погынен. Тышке тӱрлӧ марий мер ушем гыч нылле наре самырык еҥ толын.
Вашлиймаш годым 2015 ийыште марий мер ушем-влакын паша радамыштым, VII Марий самырык тукым слётым эртарен колтымо йодышым каҥашеныт. Поснак пӱсӧ мутланымаш шочмо йылме шотышто эртен. Самырык-влак деч ятыр темлымаш йоҥген. Мутлан, оласе марий йоча-влаклан рушарня школым почмо, марий йылме дене курсым эртарыме, самырык-влаклан марий журналым лукмо шотышто.
Тӱвыра идалыкыште кыртмен пашам ыштымылан, сай лектышыш шумышлан ятыр самырык ӱдыр-рвезе-влаклан Марий Эл Республикысе тӱвыра, печать да калык-влакын пашашт шотышто министр Михаил Зиновьевич Васютин таумут-влакым кучыктыш.
А «ВийАр» тӱвыра да келшымаш ушем, 19 февральыште «Сылнымут батлым» эртараш палемден.
