Фестиваль: Элнет кундем — мастар кундем!

«Элнет кундем — мастар кундем!» – тыге маналтеш Волжский район Шайра кундем Мӱшыл ер (Морской глаз) воктен эртараш палемдыме фестиваль. Тудо тений 5–6 июньышто эртаралташ тӱҥалеш.
5 июньышто 10 шагатлан Руш Шайра ялыште Опиня Войконова лӱмеш историй-этнографий тоштерым почмо тат лиеш. Тушко Йошкар-Ола, Озаҥ, Моско, Санкт-Петербург, Кострома, Малмыж да моло кундемлагычынат, Марий Элын ятыр районлаже гычынат тоштер да мер пашаеҥ-влак чумыргат.  13.00 шагатлан «Ялысе тоштер – ялын ончыклыкшо» лӱман семинар-практикум эртаралтеш. Тышке тыгак воктен кундемлаште илыше-влакат ӱжалтыт. Тоштерлан экспонат погымо паша тӱҥалеш.
Фестиваль 20126 июньышто 11.00 шагатлан «Элнет кундем — мастар кундем!» – фольклор, эстраде да тоштер пайрем почылтеш. Элнет дене кылдалтше кундемла гыч кажне делегаций але посна еҥ шке выставкыж дене участвоватла. Ончерым 6.00 шагат эр гычынак оформитлаш тӱҥалыт. Ер лопышто, ончычсо Руш Шайра школ воктене, тоштер ӱзгар ончер шаралтеш. Тидлан лӱмын ӱстел-влак келыштаралтыт.
Ятыр номинаций дене тоштер таҥасымаште иктешлымаш лиеш:

  •  еш дене ямдылыме экспонат-таҥасымаш
  • посна еҥын ямдылыме экспонат-таҥасымаш;
  •  школ тоштер-влакын экспонат-таҥасымашышт.

Поснак Параньга, Морко, Юлсер, Провой-влакым – икманаш, Элнет кундемла гыч марий-влакым, алал-кумылын вучена.
Ача-кочан кучылтмо, ыштен кодымо да тачат аралалтше чыла арвер-ӱзгарым фестивальыш кондаш лиеш: сурткӧргыштӧ кучылтмо арвер, фотографий, плотник ӱзгар, шке ыштыме пуш, янлык кучымо арвер, тошто марий вургем… да чылажат. Посна кугу вер Кугу сар пагытысе экспонат-влаклан ойыралтеш.
Йодмашым laid.kozlov@mail.ru, (836-2) 46-66-11 факс дене 25 май марте колтыман (йодашын формыжо лишыл жапыште савыкталтеш).
Йодышым 91-99-65, 8-964-861-87-61; 61-48-20 телефон-влак дене рашемдаш лиеш.
Тоштерым ышташ полшаш кумылан-влак шке экспонатыштым Опиня Войконова лӱмеш Руш Шайра ялысе тоштерлан пӧлеклен але оксала пуэн кертыт (шергын огыл).
Ты кугу фестивальын организаторжо-влак (кутырен келшыме почеш):

  •  Валентин Колумб лӱмеш рӱдер-тоштер;
  • «Марий ушем» («Союз мари») Регионысо мер организаций;
  • «У вий» («Молодая сила») Марий самырык ушем;
  • «ВийАр» марий самырык-влакын тӱвыра кыл ушемышт;
  • «Югорно» («Священная дорога») Регионысо мер организаций.

Моло-влакат ты сомылыш ушнен кертыт – жапна эше уло. Пагален ӱжына чыландамат!

Организатор-влак.
Иван Речкинын фотогафийже-влак.

Кидшер
Шонымашым ешараш