Ончыч ава-ачана-влак шукырак оксам сберкнижкаште араленыт. Илыш вашталтын, ынде банк-влак пашадарымат студент-влаклан стипендийымат пластик картышке колтат. Иктышт шийвундыштым тыгай йӧн дене «аралат» гын, а весышт банкыш процент дене пыштат.
А «Кидшер» интернет-журналын самырык лудшыжо-влак оксам пеленышт коштыктат але картыште кучат?
Анастасия Мокеева:
— Илыш у технологий дене пайдаланаш кӱшта. Сандене кугурак оксам кертмем семын картыштак кодаш тӧчем. А иктаж-могай кугурак ӱзгарым але вургемым налаш шонем гын, карт гыч налам. Тыге йӧнанрак, шонем. Адакшым пеленемат оксам коштыкташ тыршем. Изинекак ковам ден авам ойлен шогат: «Кеч-кунамат кӱсеныштет, оксагалташтет оксам кодаш тырше, тунам гына оксан лият.» Тидым шотыш налын, кеч лу ырым да пеленем кодем.
Ольга Купсольцева:
— Палыме йолташем-влак кӱлешан годым веле оксам карт гыч налыт. А мый стипендийын ик ужашыжым картычкыште, кокымшыжым — мӧҥгыштӧ, а кумшыжым оксагалташтем кучем.
Лира Кудряшова:
— Пластик картыштак кучаш тыршем. Кӱлеш годым банкоматыш куржталын миен толашат лиеш. Пеленем шийвундым шагал налам, вет кызыт карт дене чыла гаяк кевытыште сатулан тӱлаш лиеш.
Христина Иванова:
— Оксам картыште аралем. Тыгай йӧн дене чыла студент пайдалана.Пластик карт — шöртньö гай. Тудын дене гына ме шкенан университетыш пурен кертына. Тыгак тышке мемнан кугу куанна, стипендий, толеш. У йöн моткоч келша.
Наталья Яшметова:
— Сберкнижка лийме годым лӱмын банкышке кошташ да черетыште шогаш логалын гын, кызыт кеч-могай лишыл банкоматыште оксам налын кертына. Тачысе кечын шуко кевыт ден аптекыште налме сатулан карт дене тӱлаш лиеш. Тыгай йӧн жапым аныклаш полша. Интернет йӧн дене пайдаланен, телефоныш оксам пыштен, вес еҥлан арымеш пуэн кертына. Тыгак моло сомылымат шукташ лиеш. Тиддеч посна кӱсенышкат икмыняр теҥгем кучаш уто огыл.
Настя Айгузина:
— Мый пеленем 500 теҥге деч шукыжым ом коштыкто. Улшо оксам гычвитле процентше — картыште, кумлыжым еврош кусаренам, кодшыжомӧҥгыштӧ кия. Вот тыге оҥайын окса кучылтам.
Алевтина Байкова ден Николай Любимов мутланеныт.