Писатель, журналист Валентин Борисович Исенековын шочмыжлан 19 мартыште 80 ий теме. Тыгай поро, Шарнымаш касым «Ямде лий» газет редакций С.Г.Чавайн лӱмеш национальный книгагудышто эртарен.
Шарнымаш касыште Валентин Борисовичын ятыр тунемшыже, тудлан тауштен пӧлеклалтше почеламут-влакым лудыч. Лишыл родыжо, йолташыже, коллегыже-влак шарналтен, тудын илышыже да усталыкше нерген лач поро мутым гына ойлышт. Чынжымак, Валентин Борисовичын марий сылнымут, журналистике вияҥже манын, изи огыл надырым пыштен. Каласен кодыман, Валентин Исенековын 80 ияш лӱмгечыжым Сылнымут идалыкыште палемдена. Тидын вашеш «Ямде лий» газет редакций «Капар тукым» книгажым савыкташ ямдылен, но кызытеш шийвундо укелан кӧра савыкталт шукталтын огыл. Ӱшанен кодына, тудо ош тӱням ужеш, да тыгаяк мероприятийым эртараш эше ик амал лектеш.
Автор: Николай Любимов, марий блогер
Елена Рублёван фотожо-влак.