Волгатехыште ынде кум ий почела «Келшымаш кӱвар» фестиваль эрта. Тиде фестиваль тӱрлӧ калыкым иквереш уша. Калыкын шкешотан тӱвыра да йӱлажым почын пуа. Тиде ийын гын, 23-25 мартыште эртаралте.
23 мартыште Молдавий деч мастер-класс эртен. Нуно мэрцишорым ышташ туныктеныт. 24 мартыште – таджикистан-влак шке тӱвырашт нерген кумданрак каласкаленыт да кушташ туныктеныт. А 25 мартыште фестивальын тӱҥ ужашыже эртен. Тыште тӱрлӧ калыкын оҥай ончерже, чийыме вургемже, национальный кухньыжо да кудыжо лийын, тыгак почеламутым сылнын лудмаш, куштымаш-влак эртеныт.
Фестивальыште руш, марий, армян, таджик, киргиз, молдаван туркмен, узбек, лак, авар, даргин национальность-влак лийыныт.
Автор: Елена Рублёва. Авторын фотожо.