Марий ӱдырлан кугу ӱшан!

25 апрельыште Ижевскыште «Финно-Угорий студенчествын миссше-2015» тӱнямбал конкурс эрташ тӱҥалеш. Тушто шке калыкшын, кундемжын чапшым шым ӱдыр аралаш тӱҥалеш. Конкурсышто марий калыкын шкешотан улмыжым Мария Ильина ончыкта.
Мария – уста куштызо. Тудо «Цармис» куштымаш театрын солисткыже, ик жап «Марий Эл» кугыжаныш ансамбльыштат куштен. Кужу ӱпан, вичкыж кыдалан, сылне йӱкан чевер ӱдыр чылт Пампалче. 
Кужэҥер районысо Шорсолаште шочын-кушшо М.Ильина МарГУ-со Калыкле тӱвыра да тӱвыра кокласе кыл институтышто хореографлан пытартыш курсышто тунемеш. Тылеч ончыч ты специальность денак Палантай лӱмеш тӱвыра да сымыктыш колледжым тунем пытарен. «Марий Эл» ГТРК-ште вӱдышылан пашам ышта. «Паша ятыр жапым налеш гынат, «Цармис» куштымаш театрыш кошташ эреак тыршем. Кушташ моткоч йӧратем, садлан тиде паша ок нойыктаре, мӧҥгешла, куаным да кӧргӧ вийым ешара», — ойла куштызо.
Мария 2011 ийыште «МарГУ-н студентке миссше» лийын. «Финн-Угрий студенчествын миссше» конкурслан кыртмен ямдылалтам. Пашаштат, Марий кугыжаныш университетыштат полшен шогат. Творческий номерем марий куштымаш лиеш. Келшыше калыкле костюм-влакым ургена, конешне, нуно стилизованный лийыт. Тиде конкурс ӱдырын койыш-шоктышыжым, мастарлыкшым, уш-акылжым ончыкта. Дефиле, визитке, творческий номер полшымо дене калыкна нерген каласкалаш тӱҥалына», — манеш студентке.
Маша чолгалыкшым чыла аланыштат ончыкташ тырша: кушта, мура, вӱдышылан пашам ышта, тыгак тудо — РМЭ-се Самырык тукым правительстве пеленсе тӱвырам да туризмым вияҥдыме шотышто пашаче группын членже да «Марийская круговая» фестиваль проектын авторжо.

Автор: Анастасия Эманова,
«Кугарня» газетын журналистше

Кидшер
Шонымашым ешараш