Сергей Иванович Таныгин – кумдан палыме марий сÿретче, «Марий Ушем» РООн чолга еҥже, 1997 ий гыч Россий Художник-влак союзын членже; Йыван Кырла лӱмеш театральный премийын лауреатше (2008 ий); Валентин Колумб лӱмеш премийын лауреатше (2009 ий); Марий Эл Республикын кугыжаныш премийын лауреатше (2009 ий).
Тений, «Йошкар-Ола театральная» конкурс эртыме годым Сергей Таныгин «Марий Эл республикын сулло сӱретчыже» лӱмым сулен налын.
Сергей Иванович Таныгин – 1968 ий 7 августышто Марий АССР Кужеҥер районысо Верх-Ушут ялыште шочын. Йошкар-Оласе 1-ше номеран школ интернатым пытарымеке, тӱссымыктыш училищыш тунемаш пура да 1987 ийыште пытарымеке, Москошто ВГИК-ыш шинчымашым погаш кая.
Кинемтографий институтым 1993 ийыште тунем лектын. Дипломжо «Калевала» эпослан пӧлеклалтын, 17 графический пашам ушен. Диплом паша гыч икмыняр сӱретше Марий Элын Тӱссымыктыш тоштерыштыже аралалтеш. 1996 ий гыч Сергей Таныгин М.Шкетан лӱмеш Марий кугыжаныш драмтеатрыште тӱҥ сӱретчылан тырша.
Художник-постановщик семын 60 утла спектакльым шынден. «Сӧсна поминка» да «Айдеме йӧратымаш» спектакль-влакым сӧрастарен сценыш 2015 ийыште лектын.
Персональный выставкыже-влак Российыште веле огыл, тыгак йот эллаштат эртеныт. Пытартыш экспозицийлан М.Шкетан лӱмеш театрыште «Сергей Таныгинын сценографийже» ончерым шотлыман;
«Финно-угорский триптих» (Ижевск-Саранск-Йошкар-Ола) международный проектыште Сергей Таныгинын пашаже-влак «Три тотема» выставкыште лийыныт.
Тыгак Владимир Пресняковын «Замок из дождя» мурыжлан декорацийым художник семын ыштен.
Уло кумылын Сергей Иванович Таныгиным «Кидшер» интернет-журнал «Марий Элын сулло сӱретчыжӧ» лӱмым налме дене саламла!
Материалым «Марий ушем»-ын сайтше гыч кучылтмо.
Статьям Ирина Закиева ямдылен. Й.Богомоловын фотожо-влак.