Татьяна Денисова: «Чон гыч лекше мурем тыланда пӧлеклем!»

Тиде мурызым палыдыме еҥже укеат, шонем. Лывырге кумылан, шыма койыш-шоктышан, ныжыл йӱкан Татьяна Денисова калыкын ик эн йӧратыме мурызыжо, Марий Элын сулло артисткыже, йӧратыме да йӧратыше ава.
— Те шукерте огыл концертым эртарышда. А ты гана концертдам кӧмыт сӧрастарат? Мо дене тудо ойыртемалташ тӱҥалеш?
— Кокымшо гана эртараш шонен омыл ыле. Икымше гана концертышкем шуко еҥ пурен кертын огыл, вер чылалан ситен огыл. Санденак, калык йодмо почеш, 19 апрельыште кокымшо гана эртарем. Касым Василий Якимов, Роза Искакова, Валерий Тихонов, Марина Садова да Ольга Зарецких сӧрастараш полшат.
— Татьяна Яковлевна, те калыкын ик эн йӧратыме мурызыжо улыда. Кузе те муро аланышке толында? Шарнеда мо икымше мурыдам, икымше гана сценышке лекмыдам?
— Мый изинек муренам, гармонь денат шоктенам. Мурызо лияш шонен омыл. Школ деч вара Моркысо профтехучилищыште тунемынам. Лач туштак 1981 ийыште «Йолташемлан» лӱман мурым гармонь дене йоҥгалтаренам. Вара ик ий верысе чоҥышо организацийыште пашам ыштенам. Тушто камвозын эмганенам. Эмлалтмек врач тетла ты пашам ышташ кӱштен огыл. Вара парикмахерлан тунем лектынам. Ик жап Марий кугыжаныш филармонийыште ыштенам. Озаҥысе тӱвыра институтым тунем лектынам. Тачысе кечылан дипломан специалист улам.
— Муро аланыште ынде кумло утла ий улыда, тачысе кечылан репертуарыштыда мыняр муро уло?
— Кумло ий утла жапыште репертуарыштем тӱрлӧ сынан кудло наре муро погыненат, очыни.
— Шукерте огыл, тендан репертуарда Дагестан вел сем почеш возымо «Каенат» муро дене пойдаралте. Кузе тиде муро шочын?
— Икана, ты семым интернет гоч йолташ ӱдырем, колтен ыле. Тудо «Таня, тиде семлан мурым возыза да шкеак муро. Моткоч чонеш логалше сем», — манын. Колышт ончышым, моткоч келшыш. Вара Татьяна Пчёлкина мылам мутым возен. Икманаш, тиде муро чоныштем ятыр жап «кӱын» киен.
— Яра жапшым йӧратыме мурызына кузерак эртара?
— Самырык годым оҥай статуэтке-влакым погем ыле, гармоньым шокташ йӧратенам. Мурызо-влакым ончем, мурыштым колыштам. Тыгак книгам, сылнымутым лудам.
— Татьяна Яковлевна, усталык пашада ушнен шогыжо, ончыкыжымат мемнан сылне деч сылне муро дене куандарен шогыза.
— Тау! Сугыньда шужо.

Иван Денисов (эргыже), Татьяна Денисова да Кирилл Винокуров

Николай Любимов мутланен.

Кидшер
Шонымашым ешараш