Марий Талешке-влакым шарнен илат!

Ончыкылык тукым Кугу Отечественный сарын, марий калыкын геройжо, талешкыже-влакым палыже, шарныже да лӱмыштым кумданрак шарен колтыжо манын, 24 апрельыште Йошкар-Олаште «Ший Талешке» республик кӱкшытан фестиваль эртаралте.
Фестиваль Марий талешке да Кугу Отечественный сарыште сеҥымылан 70 ий темме вашеш пӧлеклалтын, сандене мероприятий тӱҥалтыште марий калыкын геройжо-влакым кынел шогал шарналтеныт.
Марий кугыжаныш университетын чолга студентышт Марий тӱвыра рӱдерын директоржо Валерий Помпеевич Григорьевын вуйлатымыж почеш, талешке-влакын чапкӱшт воктеке пеледышым пыштеныт.
А залыште улшо-влак деке саламлымаш мутым Марий Элысе тӱвыра, печать да калык паша шотышто министерствын специалистше Ольга Арсентьевна Веденькина ойлен, а вара участник-влак шке пашашт дене палдареныт.
Конкурсыш 10 тӱрлӧ да шкешотан паша пурен. Жюрин еҥже-влак паша-влаклан сай акым пуэныт. Кумшо верым, «Тендам шарнаш тӱҥалына» паша дене Морко район Коркатово лицейын тунемшыже  Деменьтева Мария  налын. Кокымшо верым, «Шарнена, кугешнена»  паша дене У Торъял район Тошто Торъял кыдалаш школын тунемшыже Мамаева Анастасия сулен. Икымше верым, Шернур посёлкысо 1 №-ан Совет Союз Герой Янаулов лӱмеш кыдалаш школын тунемшыже Рукавишникова Кристина «Мыйын кугезе кочам» паша дене налын.  А тӱҥ сеҥышылан Параньга район Елеево кыдалаш, школын тунемшыже Олеся Поповам шотлыман. Олесян «Шинелян ӱдыр-влак» пашаже эн оҥай да шкешотан лийын.

Каласен кодыман, кажне тунемшылан пашам ямдылымаште туныктышо-влак полшеныт. Нуныланат кугу таум каласаш кӱлеш.
Фестиваль кышкареш марий герой, талешке-влаклан пӧлеклалтше «Салтак солык» акций негызеш ончер лийын. Фестиваль деч вара, тӱрлымӧ солык-влакым иктыш урген, Т.Е.Евсеев лӱмеш тоштереш вераҥдат.
«Ший Талешке» фестивальым Марий Эл республикысе тӱвыра, печать да калык-влакын пашашт шотышто министерстве, Туныктыш да шанче министерстве, Марий кугыжаныш университет, Республикысе марий тӱвыра рӱдер эртареныт.

Кидшер
Шонымашым ешараш