Шарнымаш оҥам почыт!

Марий шӱлышан, марий йӱлам, йылмым да тӱвырам йӧратыше еҥ-влакна пеш шуко улыт. Кажне жапын – шке талешкыже. Кодшо курымын ик тыгай марий талешке Пётр Григорьевич Корнилов. 7 майыште журналист, писатель Пётр Григорьевич Корнилов лӱмеш шарнымаш оҥам почыт.
П.Корнилов Волжский районысо Кӱшыл Азъялыште вич шочшан марий ешыште шочын-кушкын, куд ияшак школыш тунемаш каен. Тӱҥалтыш класс деч вара шинчымашым Сотнур школышто поген, Йошкар-Оласе марпедрабфакыште тунемын. 1940 ийыште Морко районысо Кожлаер школышто туныктен. 1943 ийыште тудым салтакыш налыныт, фронтышто кредалын. Умбакыжым, Горькийысе партшколым тунем лектын, комсомол пашаште тыршен. 1955 ий гыч «Молодой коммунист» газет редакийыште вуйлатышылан шоген, а 1967 ийыште «Марий коммуна» газетын тӱҥ редакторжо лийын.
Сай пашажлан Пётр Григорьевич кок гана «Знак Почета» орденым да «За трудовую доблесть» медальым, «РСФСР тӱвыран сулло пашаеҥже» чап лӱмым налын.
Пётр Григорьевич мер илышыштат шолын шоген. Ятыр ий Марий АССР Верховный Совет депутат, Президиум председательын алмаштышыже лийын, Журналист ушем вуйлатышын алмаштышыжланат ыштен. Марий сылнымутышто тудо «Мӱй олык», «Савырыме кумыл», «Илыше чодыра», «Олма там» книгаже-влакын авторжо семын палыме.
Чаманен каласаш логалеш, 1982 ий 21 декабрьыште уста журналистын ӱмыржӧ кӱрылтын.

Кидшер
Шонымашым ешараш