Йылме йодыш: Кузе чын возыман?

Айдемын возымыжо, мутланымыже — тудын шинчымашыжым, возымо  культуржым  ончыкта.
Чыланат тӱрлын ойлена да возена. Иктышт, 1972 ийысе орфографий почеш, а весышт 1992 ийысе мутер почеш. А 2011 ийыште Йылмым, литературым, да историйым научнын шымлыме В.М. Васильев лӱмеш марий институтын лукмо мутерже икмыняр жаплан возымо годым, неле жапым конден. Кӧ кузе моштен, туге возен.
Шукерте огыл, интернетыште лаштык-влакым ончымо годым «самырыктукым» мут возымо пернен. «Йоҥылыш возеныт!», — шоналтышым. Варажым эше икмыняр вере «самырыктукым» мутым пырля возымым ужаш перныш.
У орфографий мутер дене тыге возыман мо вара? Тиде йодышым филологий шанче кандидат Елена Михайловна Андрианова дене рашемдаш тыршышна. Кузе вара возыман, «самырык тукым» але «самырыктукым»?
Самырык тукым рушлаже молодое поколение эше молодежь, каласен кертына. Ала кусарат да, молодёжь мут ик мут дене возалтеш, да нунат тыгак возат – самырыктукым?
Марий йылме дене кыдалаш школлан обществознаний дене термин-влак мутерыште (Барцева Л.И., 2011 ий) «рвезе пагыт» мутым муна. Тушто посна возымо. Тугеже «самырык тукым» мутымат посна возыман?
Тургыжландарыше йодышыш, ятыр шанчызе-влакым ӱжна. Чыланат посна возаш темлат.
А у орфографий мутер почеш «самырык тукым» мутым, диктант, сочинений возымо годым, пырля серена гын, тиде йоҥылышлан шотлалташ тӱҥалеш?
Оҥай, «самырыктукым» тиде тошто мутымак у семын пуат, но ятыр еҥже тӧнеж, полшык, калыкле, сыҥыса мут-влакын значенийыштым огытат пале. Йодыш лектеш, ала шанчызе-влак марий йылмышке пеш шуко у мут-влакым пуртеныт?
Тидын шотышто шке шонымашдам мыланнаят возыза эл. почтына — info@kidsher.ru вашкылым тыштат ышташ лиеш.

Кидшер
Шонымашым ешараш