Икымше июнь — Йочам аралыме тӱнямбал кече. Тудын вашеш республикыштына ятыр оҥай мероприятий эртаралтеш. Теве, 1 июньышто 12 шагатлан Рӱдӧ тӱвыра да каныме паркыште эстраде аланыште Йоча-влакым аралыме кечылан пӧлеклалтше «Ик кечым пӧлекле йочалан» пайрем эртарташ тӱҥалеш.
Тиде кечын пайремыш толшо-влакым тӱрлӧ оҥай модыш, сылне деч сылне муро, шуко сувенир вучат. А «ЕВРОФУД» ООО «Мари Айс» мороженыйым чолга йоча-влаклан кучыкта.
Толшо-влакым Кугунур тӱвыра пӧртын «Шонанпыл» да самырык да йоча-влакын творчество Пӧлкан «Шокто гармонь» йоча фольклорный ансабльже-влак куандараш тӱҥалыт.
Пайремым Республикысе марий тӱвыра рӱдер эртара. «Пӧлекле йочалан ик кечым! А ме пайремым пӧлеклена», — ойлат организатор-влак.
Автор: Николай Любимов,
«Кидшер» интернет-журналын тӱҥ редакторжо.