Сеҥымашыште тудынат надырже изи огыл!

0
175

Кугу Ачамланде сар годым совет калык, тудын сарзывийже Шочмо элын эрыкшым арален налын, кугу исторический сеҥымашым таптен да уло тӱня калыкым фашист куллык деч утарен. Марий-влакат изи огыл надырыштым сеҥымашке пыштеныт.
Ты гана Совет Союз Герой, Гвардийын полковникше Марьин Иван Ильич нерген «Ме шарнена» интернет-проектыштына каласкалена.
Иван Ильич 1922 ий 6 сорлаште Мари-Билямор селаште (кызыт — Мари-Турек район Марий Эл) шочын. Лу классым тунем пытарен. 1940 ий сорлаште тудым Йошкар Армий радамыш налыт. 1941 ийыште стрелок-бомбардир-влакым ямдылыме Челябинский военный авиационный школым тунем лектын. Шыжа тылзе гыч — Кугу Ачамланде сарын фронтлаштыже. Кредалмаште кок гана сусырген.
Сар пытымылан гвардийын старший лейтенантше Иван Марьин 3-шо Белорусский фронт 1-ше воздушный армий 213-шо бомбардировочный авиадивизийын 24-ше гвардейский бомбардировочный авиаполкысо звено штурман лийын. Сар жапыште тушманын боевой техникыже да салтакше-влакын чумырген верланымашым, нунын кӱлешан объектыштым бомбитлен, разведкыш да партизан-влаклан грузым кондыштын, 793 боевой чоҥештымашым ыштен.
СССР Верховный Совет Призидиумын Указше почеш 1946 ий 15 агаште «тушман ден кучедалмаште, бомбардировочный ударым ыштымаште лӱддымылык ден героизмым ончыктымылан» гвардийын старший лейтенантше Иван Марьинлан Совет Союз Герой кӱкшӧ лӱмым пуэныт да 9049 №-ан Ленин орден ден «Золотая Звезда» медальым кучыктеныт.
Сар деч вара Марьин Совет Армийыште служитлен. 1952 ийыште Военно-воздушный академийым пытарен. 1962 ийыште подполковник званийыште запасыш лектын, варажым запасын полковникше званийым налын. Москваште илен да пашам ыштен. 1999 ий 31 шорыкйолышто колен, Москвасе Троекуровский шӱгарлаште тойымо.
Тыгак Йошкар Знамя кок орден ден, Отечественный войнан 1-ше степенян кок орден ден, Отечественный войнан 2-шо степенян кок орден ден, Трудовой Йошкар Знамя орден ден, Йошкар Звезда орден ден, ятыр медаль ден палемдалтын.

Материыалым ямдылыме годым
С. Г. Чавайн лӱмеш калыке книгагудын сайтшылан эҥертыме.

ПАЛДАРАШ
viktaryshe

«Кидшер» интернет-журналын увер службыжо.

Увер ден материалда-влакым info@kidsher.ru электрон почто дене вучена.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.