Ушемын у вуйлатыше!

«ВийАр» тӱвыра да келшымаш кыл ушемым Николай Любимов вуйлаташ тӱҥалеш.
Эртыше кечылаште «ВийАр» ушемын погынымашыже эртен. Тушто Алексей Очеев «ВийАр» ушемын председательже семын кум ий жапысе иктешлымашым ыштен. Варажым тӱрлӧ амал улмылан кӧра, председатель гыч кораҥмыж нерген палдарен. Ушемын председательжылан Николай Любимовым темлен.
Николайым калык «Кидшер» интернет-журналын тӱҥ редакторжо семын пала. Рвезе У Торъял район Алеево ялыште шочын-кушкын. Токтарсола школышто шинчымашым поген. 2012 ийыште Токтарсола школ пелен Россий кӱкшытан марий самырык тукымын IV слёт деч вара мер паша деке утларак шӱмаҥын. Советский районысо Ӱшнӱр школышто тунеммыж годым Николай марий калык дене палдарыше «Илыш ик гана веле пуалтеш» блогым почын. А икмыняр жап гыч тиде блог «Кидшер» интернет-журнал марте кушкын.
Таче Николай Марий кугыжаныш университетын студентше. Икымше курс гычак «ВийАр» дене палыме лийын, ушемын пашаже нерген уверым шаркален, мероприятийлашке уло кумылын ушнен.
— «ВийАр» тӱвыра да келшымаш кыл ушемын пашажым сайын виктараш тӱҥалеш, шонена. Шке йырже шкеж гаяк чолга, писе уш-акылан ӱдыр-рвезе-влакым чумырыжо. Пашат ушнен толжо, — палемден Алексей Очеев.
Николай ушемын пашажым утларак кумдаҥдаш палемден, икмыняр темлымаш дене палдарен. «Тений сылнымут идалыкыште ӱдыр-рвезе-влак Морко кундемыш сылнымут автопробегыш тарванат, марий самырык тукым слётын пашашкыже ушнат, иктешлыше Сылнымут батлым эртарат, кеҥежым Эстонийыште эртыше МАФУНын конгрессышкыже каят. Моло мероприятий нерген ончыкшым калыкым эреак палдараш тӱҥалына. «ВийАрын» вожшо пеҥгыде, укшлаже чот шарлен, ме, нӧргӧ лышташыже, кушкына, тунемына, — шке мутшым кошартыш Николай Любимов.

Автор: Алёна Александрова,
«ВийАр» тӱвыра да келшымаш кыл ушемын еҥже.

Кидшер
Шонымашым ешараш

  1. Татьяна Васильева

    Саламлем. Пашада гына сайын кайыже. Пеш чолга рвезе улыда.

    Ответить
    1. viktaryshe автор

      Татьяна, пеш кугу тау!

      Ответить