Шочмо кечет дене, йолташ!

0
179

Пессимист-влаклан кажне шочмо кечышт ӱмырыштын ик ийжым кӱчыкемдымыла чучеш, а илышлан куанен шогышо-влак кажне идалык ешаралтме дене уш-акылым погат да сай могырыш вашталтыт манын, шкеныштым ӱшандарат.
Ме, «Кидшер» интернет-журнал редакцийын еҥже-влак илышыште оптимист улына, садлан мемнан ончыкылыкна волгыдо да илышна сай лиеш, манын ӱшанена. Мемнан кокласе тӱҥ оптимистналан пеледыш тылзын латкудымшо кечынже 20 ий темеш. Шочмо кечыж деч вара тудо эше ик ийлан ушанрак, мудреч да сайрак лиеш. Чыла ужын шукташ тыршыше шинчаончалтышыж дене кумда тӱням эше талынрак шымлаш тӱҥалеш.
Саламлымаш статьялаште шочмо кечым пайремлыше айдеме нерген возат, илыш-корныжо нерген ик-кок шомакым ойлат. Айста меат, йолташ-влак, пырля ончалына: могай тудо айдеме – Николай Любимов.
Николай – эше моткоч самырык рвезе. Колюн илыш-корныжо эше тӱҥалеш веле, садлан тудын эше чыла ончылно. Туге гынат, шке вачымбалныже нелытым нумалаш вуйым ок шупш. Полмезе рвезе шочмо калыкын йылмыжым, тӱвыражым арален кодаш манын, моткоч кӱлешан пашам ышта. Марий калыкын илышыже да калыкше нерген статья-влакым воза, шке сайтшым вӱда.
«Кидшер» интернет-журналым ятыр калык лудеш. Сайт кок йылме дене чоҥалтеш: марла да рушла. Тыглай огыл Николай шке сайтшым «Кидшер» манын лӱмден. Марий гыч тиде мут руш йылмыш «пульс» манын кусаралтеш. Мемнан йолташна тӱрыснек тидын дене келшен толеш. Тудо жапым шижын моштышо, самырык, чолга, марий рвезе. Тудо эртышым ок мондо. Тушеч сайжым налын ончыкылыкыш «кӱварым» ыштыме гай илышыжым чоҥаш тырша.
Колю йолташна эше самырык гынат, илышыштыже тӱрлӧ событий ятырак погынен. Шочмо вер-шӧржӧ нергенат каласен кодыде ок лий. Николай Любимов У Торъял районысо Алеево ялыште шочын-кушкын. Токтарсола школышто шинчымашым поген, шочмо йылме да сылнымут деке шӱмаҥын, «Шонанпыл» йоча ушемыш ушнен. Икмыняр жап гыч йоча ушемын активистше гыч Николай «Шонанпылын» председательже марте «кушкын».
2012 ийыште, кеҥежым Токтарсола школышто IV Россий кӱкшытан самырык тукым слёт эртен. Николай Любимов ты слётышто пресс-службын составышкыже пурен. Тудо СМИ аланыште тыршыше журналист да студент-влак дене пырля кажне кечын лектын шогышо газетышке самырык тукым слёт нерген уверым, материалым чумыраш полшен, статья-влакым савыктен.
Умбакыже Николай Ӱшнӱр кыдалаш калыкле школышко тунемаш каен, марий йылме да литературым келгыракын шымлен. Тыштак журналистике деке тудын шӱман улмыжо да талантше шижалтын. Эше школышто тунеммыж годымак Живой Журнал (LiveJournal) платформышто «Илыш ик гана веле пуалтеш» (Жизнь лишь один раз дается») шке блогшым почын. Тиде журналыште рушла да марла возымо статья-влакшым Николай интернет йӧным кучылтын савыкташ тӱҥалын.
Николай блог дене серлаген огыл, эре ум кычалын. Икмыняр жап гыч Ӱшнӱр школыш компьютер лингвист Андрей Чемышев лекцийым лудаш толын. Рвезе Андрей Чемышевым моткоч тӱткын колыштын да шке марий сайтым почаш шонымыж нерген тудлан ойлен. Андрейлан ты шонымаш келшен, вет марий йылме дене интернет сайт-влак моткоч шагал улыт. Пел ий гыч илышыш «Кидшер» этнокультур проект илышыш шочын.
Латик классым тунем пытарымеке, Николай Марий кугыжаныш университетысе Калыкле тӱвыра да тӱвыра кокласе кыл институтыш марий йылме да литературым туныктышылан кӱшыл шинчымашым погаш пура. Группышто тудым старостылан ойырат. Оҥай тунемме тургым тӱҥалеш. Тунемме жап шыгыррак гынат, «Кидшер» интернет-журналыште тӱҥ редактор сомылым тӱрыснек шукта да тидлан ятыр жапым ойыра.
Кодшо кеҥежым, Николай Любимовым «ВийАр» ушемын председательжылан сайленыт.
Тиде чылажат мемнан йолташнан илыше гыч факт-влак. Могай иктешлымашым ынде ыштен кертына? Чын! Николай – чолга, амбициозный самырык марий рвезе. Кызытсе у технологий илышыш шыҥенак пура, но туге гынат мемнан йолташна тӱрыснек вуй мучаш гыч йол копа марте марий чонан айдеме. Сценыште марий мурым муралта, моткоч сайын концерт программымат вӱда, кушталтен-тавалтен колта, марий чонжым почеш. Кеч самырык ден, кеч илалше еҥ ден иктӧр мутлана. Марий улмыж деч вожыл ок шого. Теве тыгай лийшаш марий самырык калыкна. Николай изинекак шочмо калыкше верч лийын, ончыкыжымат тыгак лиеш.
«Кидшер» интернет-журналын коллективше уло кумылын шке коллегыжым шочмо кечыж дене саламла. Ме тудлан ончыкыжымат шке илыш-умылымашыште пеҥгыдылыкым, тунеммаште сай шинчымашым, пашаште сеҥымашым, пеҥгыде тазалыкым тыланена. Ме тыйым пагалена да аклена. Шуко-шуко ийым тыланена тылат, да тыйын йӧратыме «Кидшеретлан»! Шочмо кечет дене, йолташ!

«Кидшер» интернет-журналын коллективше.

ПАЛДАРАШ
viktaryshe

«Кидшер» интернет-журналын увер службыжо.

Увер ден материалда-влакым info@kidsher.ru электрон почто дене вучена.

ШОНЫМАШДАМ КОДЫЗА:

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.