Кугу Ачамланде сарыште геройлын кредалын!

0
94
гана онченыт

Кугу Ачамланде сар годым совет калык, тудын сарзывийже Шочмо элын эрыкшым арален налын, кугу исторический сеҥымашым таптен да уло тӱня калыкым фашист куллык деч утарен. Марий-влакат изи огыл надырыштым сеҥымашке пыштеныт.
Ты гана Совет Союз Герой, сержант Краснов Зосим Алексеевич нерген «Ме шарнена» интернет-проектыштына каласкалена. 
Зосим Алексеевич Кутюк-Кинер ялыште (кызыт — Марий Эл Морко район) 1924 ий 2 сорлаште шочын. Тӱҥалтыш школым пытарымек колхозышто пашам ыштен. Тудым 1942 ий сорлаште Йошкар-Армийыш налыныт. Теле тылзе гыч Кугу Ачамланде сарын фронтлаштыже. Ленинград блокадым кӱрлмаште талын кучедалын. Кок гана нелын сусырген. Тӧрланымек фронтыш пӧртылын да Эстон ССР ден Польшым немыч деч утарымаште патырлыкым ончыктен. 1945 ий шорыкйоллан красноармеец Зосим Краснов 1-ше Украин фронт 21-ше армий 120-шо стрелковый дивизийын 543-ше стрелковый полкын снайперже лийын. Польшо утарымаште геройлын кредалын.
1945 ий 19 шорыкйолышто Краснов 3 тушман салтакым пытарен, 21 шорыкйолышто взводшо ден авыралтмашке логалын, тушманын пулемёт расчетшым да 14 салтакым пытарен, тул йымач йолташыже-влак ден лектын. Оппель олам утарымаште, Одер эҥерым вончымаште сержант Краснов шке чолгалыкше ден ойыртемалтын.
СССР Верховный Совет Призидиумын Указше почеш 1945 ий 10 вӱдшорышто «Висло-Одерский операцийым эртен колтымаште лӱддымылык ден чолгалыкым ончыктымыжлан» красноармеец Зосим Красновлан Совет Союз Герой кӱкшӧ лӱмым пуэныт да 6031 №-ан Ленин орден ден «Золотая Звезда» медальым кучыктеныт.
Сар деч вара Ростов область Донецк олаште илен да пашам ыштен. Чаманен каласаш логалеш, 1984 ий 5 шыжаште шӱмжӧ кырымым чарнен.
Тыгак икмыняр медаль ден палемдалтын. Тудын лӱмжым Донецкыште улшо уремлан пуэныт да Морко посёлкышто бюстшым шогалтеныт.

Материыалым ямдылыме годым
С. Г. Чавайн лӱмеш калыке книгагудын сайтшылан эҥертыме.

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.