Марий калыкым «Пеледыш пайрем» дене Оньыжа Анатолий Николаевич Иванов саламла.
Пагалыме марий калык! Мер Каҥаш лÿм дене уло кумылын чыландамат пӱртӱсын ужарген шогалын, вийым налме пагытыштыже толшо да шошо аҥа пашам мучашлыше Пеледыш пайрем дене саламлем!
Агавайремым вашталтыше тиде пайрем марий калыкын йӱлашкыже кодшо курымын колымшо ийлаштыже пурен да кызыт мартеат эрласе кечылан ÿшан дене илаш вийым пуэн шога.
Курымла вошт мемнан кугезына-влак, ош тувырым чиен, лӱмын чесым ямдылен, агавайрем кечын отышко миеныт да сай шурно лектышым, пиалым сöрвален кумалыныт. Вет мланде паша дене илыше калыкнан пӱрымашыже, куанже, ӱстелтöр поянлыкше пӱтынек кинде лектыш дене кылдалтыныт. Ме кызытат шкенан кугезына-влакын йÿлаштым аралена да у тӱсым налше Пеледыш пайремыш рӱж ушнена.
Родо-пошкудо-влак дене вашла поро уна лийын, шÿвыр-тÿмыр почеш веселан мурен-куштен, моло иза-шольо калыкым пагален, тиде пайремым рÿж эртараш да ончыкыжымат ик ой дене илаш тыршена. Вет марий калык ожнысекак шке унажым тичмаш кинде-шинчал дене вашлийын, пайрем мурым муралтен, эн сай чесше дене сийлен. Айста меат тиде поро йӱлам умбакыже шуена.
Пагалыме марий-влак! Пеледыш пайремым чолган эртарыза! Ончыкыжымат шочмо кундемнам тӱзаташ вийдам ида чамане. Шочмо йылмым, тÿвырам да кугезе йÿлам аклыме да йöратыме гоч марий калыкнам пагалыза.
Кажне марий еҥлан пеҥгыде тазалыкым, кужу ӱмырым, вашла пагалымашым да пиалым тыланем.
Пеледыш пайрем дене!
Марий Оньыжа Анатолий Иванов.