Чумбылат курыкышто кугу кумалтыш эртен

0
137

Кажне ийын марий калык Чумбылат курыкыш Курык кугызалан кумалаш чумырга. Ятыр гана «Кидшер» интернет-журналыште кумалтышыш кузе каяш, мом тидын деч ончыч ышташ кӱлмӧ нерген возенна, но тӱрлӧ амаллан кӧра, Чумбылат кумалтышыш миен-коштмо огыл.
Ты гана Юмыжак пӱрен, очыни. Эр-эрдене телефонышкем йолташем йыҥгыртыш, Чумбылат кумалтышыш каяш темлыш. «Йӧра», - каласышым, погынаш тӱҥальым.
Кумалтышыш мийымына годым еҥ погыненыт ыле. Палыме еҥ-влак дене вашлийын мутланышым, у еҥ-влак дене палыме лийым. Поро кумылан еҥ-влак, марий калыклан тазалыкым, еш перкем, тыныслыкым, пашаште сеҥымашым, чонышто ласкалыкым йодаш тышке толыт.
Чумбылат кумалтыш (1)Эн ондак чылан курык тайылыште верланыше памаш гыч вийым пуышо вӱдым подылыт, чурийыштым шӱалтат. Южышт умбалнырак йоген лекше вес памашеш йӱштыл лектыт. Вара Чумбылат да Курык Кугызан кӱшт-влак воктеке шогалын, шканышт, ешыштлан чыла сайым йодыт.
Тений кумалмашым 16 карт кугыза эртарен. Вара чылан подышто шолтымо шӱр ден пучымышым тамлышт. Оҥай, кумалтыш пытымеке шым йӱр йӱрын эртыш.
Йошкар-Олаш пӧртылмына годым, шканем иктешлымашым ыштышым. Шнуй верышке мийымеке – чонет кана, у пашалан кумылаҥат, тӱрлӧ йоҥылышет-влакым шижат.
Кӧ огеш пале гын, Чумбылат он ончыч Какшарыште (руш. Котельнич) олаште илен. 1181 ийыште Какшарым Новгородысо ушкуйник-влак налыныт, да Чумбылат Кукаркаш (кызыт Советск) олашке илаш куснен.
Чумбылат кумалтыш (3)Латкокымшо курым тӱҥалтыште, Виче кундемысе кугезе марий мландыште, Кукарка лӱман карманым чоҥен шогалтеныт. Калык Онжылан Чумбылат лӱман талешкым сайлен да моткоч кугун ӱшанен, пагален илен. Шочмо тукымжо дене ӱмырешлан чеверласаш жап толын шумеке, тудым курык серысе сылне вер-шӧреш тоеныт. Тукымжым арален кодаш тыршымыжлан, виян да чолга улмыжлан Оным калык шке юмыжлан шотлаш тӱҥалын. Неле жапыште кугезына-влак курыкыш толыныт да осал тушман деч пыдал налаш, порылыкым да тыныслыкым Курык Кугыза деч йодыныт. Кава деке нӧлталтше Шнуй курыкым тачат Ош Поро Кугу Юмо деке эн лишыл верлан шотлат.
Тачысе кечын, Чумбылатын курык (тушто тудын шӱгарже) — эн пагалыме марий калыкын шнуй верже. Чумбылатын лӱмжым чыла марий калык пала.

Чумбылат курыквалне вуйым сават! Ончаш »

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ОСТАВЬТЕ ОТВЕТ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.