Колумблан той гыч бюстым пӧлекленыт…

Валентин Колумб — тале шымлызе, шочмо йылмыжын тамжым да ямжым возышо мастар лийын. Марий йылмын сылнылыкшым поснак умылен моштен. Поэт марий мутвундым пойдарымаш верч толкыным тарватен, поэзийже ден илышым вораҥдаш, тӱвырам нӧлташ лым лийде тыршен.
26 июньышто Морко районысо Пумыр ялыште В. Колумбын 80 ияш лӱмгечыжлан пӧлеклалтше «Сылнымут аршаш шочмо Пумыр ялыштем» поэзий пайрем эртен.
Уна-влакым ял калык кинде-шинчал, сылне муро дене вашлийын. Эн ондак В. Колумбын бюстшым торжественно почыныт. Тушто шуко лӱмлӧ еҥ, В. Колумбын Ольга ӱдыржӧ, родо-тукымжо лийыныт.
Бюстым ты ялыште шогалтыме шотышто инициативе дене Вячеслав Валентинович Александров тыршен. Марий Эл республикысе тӱвыра, печать да калык-влакын паша шотышто министерстве, Морко администраций да Волаксола ял шотан илем ушненыт, верысе да кумылан еҥ-влак шке надырыштым пыштеныт.
А Колумб лудмашыш 64 участник ушнен. Морко, Провой, Шернур, У Торъял, Советский, Юлсер районла, Пошкырт кундем Мишкан район да Йошкар-Ола гыч участник-влак толыныт.
Жюри-влакын иктешлымышт почеш, тӱрлӧ номинаций дене икымше верым Геннадий Алексеев, Виктор Алексеев, Алексей Митяков, Дмитрий Соколов, Ярослав Яковлев ден Ольга Павлова, Эльвира Николаева. Илья Александров, Наталья Декина, Валентина Чимаева налыныт. Кумылаҥдыше пӧлекым Республикысе марий тӱвыра рӱдер, «Кугарня», «Ямде лий», «Марий Эл» газет-влак да поэтессе Зоя Дудина кучыктеныт.
Пайрем этнодисктеке дене мучашлалтын. Икманаш, моткоч сылне да чапле пайрем эртаралтын.
Кумданрак уверым кугарнян, 3 июльышто лудын кертыда!

«Кидшер» интернет-журналлан Татьяна Пчёлкин ямдылен.
Сергей Пчёлкинын фотожо.

Кидшер
Шонымашым ешараш