Чумыр марий калык шке уста шӱлышан эргыжым йомдарыме дене чамана. Сӱрем тылзын кумшо кечынже Морко районын эргыже, Марий Эл Республикысе тӱвыран сулло пашаеҥже, М. Шкетан лӱмеш Марий кугыжаныш драме театрын директоржо, Мер Каҥаш Вуйверын еҥже, Оньыжан алмаштышыже Юрий Петрович Русановын шӱмжӧ вучыдымын кырымым чарнен. Тудлан 47 ий ыле.
Юрий Петрович 1968 ий 15 майыште Морко районысо Нурымбал ялыште шочын. Ачаже колхоз председатель, мӱкшым ончышо, бухгалтер лийын. Аваже колхоз пашаште тыршен. Ешыште Юрий вич йоча гыч нылымше лийын. 1985 ийыште Зеленогорский кыдалаш школым тунем  пытарымек, Марий кугыжаныш университетын историй-филологий факультетыш тунемаш пурен. 1991 ий гыч «Кугарня» газетыште корреспондентлан пашам ыштен. 1996 ий гыч Марий радион редакторжылан тыршен. 2002 ийыште М. Шкетан лӱмеш Марий кугыжаныш драме театрын директорын алмаштышыжлан тыршен, а 2007 ийыште директорлан шогалтеныт. 1993 ийыште Марий книга савыктыш полшымо дене «Лышташ йӱр» почеламут сборникым савыктен луктын. «Пӱрымашлан почешмут» радио циклым ямдылымыжлан Самырык-влаклан Олык Ипай лӱмеш кугыжаныш премийым сулен. «Илаш — коклаш кече ынже код», — тыгай ӱжыкмут дене Юрий Петрович Русанов илен.
Юрий Петрович Русанов дене чеверласымаш 5 июльышто 9 шагатлан М. Шкетан лӱмеш марий кугыжаныш драме театр ончылно лиеш.
«Кидшер» интернет-журналын коллективше родо-тукымжылан, пелашыж ден шочшыжлан, театрын ешыжлан келге чаманымашым ойла.

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.