Пытартыш жапыште «Марий Эл Радиошто» ятыр у йӱкым колаш лиеш. Ик ойыртемалтше самырык мурызылан Анита Феоктистовам шотлен кертына.
Анита дене ме шукертак палыме лийынна, но, чаманен каласаш логалеш, икмыняр жап гыч кылна лунчырген. Эртыше кечылаште Анита дене Калыкле тӱвыра да тӱвыра кокласе кыл институтышто вашлийын мутланышна.
— Анита, «Кидшер» интернет-журналын лудшыжо-влаклан ала палдарет ыле, кӧ, кушеч улат, могай пашам ыштен шогет?
— Мый Марий-Турек районысо, Аимково ялыште шочын-кушкынам. Школым тунем пытарымек, 10 класс деч вара, И. С. Ключников-Палантай лӱмеш тӱвыра да сымыктыш колледжыш режиссёрлан тунемаш пуренам. Дипломым налмек, Ленин лӱмеш тӱвыра полатыште пашам ыштенам. А ик ий гыч Марий кугыжаныш университетын, Калыкле тӱвыра да тӱвыра кокласе кыл институтын студенткыже лийынам. Тачысе кечылан, Сеҥымашын XXX идалыкше лӱмеш тӱвыра полатыште методистлан пашам ыштем. Яра жап уке гынат, но йолташ, родо-тукым дене вашлияш жапым эреак муам, нунын дене пырля чонем кана. У пашалан кумылаҥам.
— Сылнымутлан чот кумылан улат. Почеламутым возет, тӱрлӧ изданийлаште савыкталтат.
— Чын. Почеламутым возаш, мый эше йоча жап гычак кумылаҥынам. Почеламутым возаш йӧратыше-влак дене пырля, кружокыш коштынам. Пеш самырык лийынам, очыни, да тиде кружок деч кораҥынам. А чонем сылнымут деч кораҥын огыл улмаш. Школышто улшо рвезым йӧратен шынденам, а рвезыже мыйым «ужынат» огыл. Сандене, шке чонемын шортмыжым кагазыш опташ тӱҥалынам. Тыге йӧратымаш темылан ятыр почеламутым возенам. Икмыняр ий эртымеке, колледжыште туныктышо-влак мыйым чын возаш туныктеныт: рифмым чоҥаш, чын мутым кучылташ, а тӱҥжӧ мутым кӧргӧ чон гыч колташ.
— Анита, почеламутетым лудмек чынжымак, кӧргӧ чон-шижмашын шортмыжым шижаш лиеш. А могай темылан тый возен шогет? Мо тыйым возаш кумылаҥда?
— Почеламут-влакым тӱрлӧ темылан возем. Ойыркалымаш уке. Чот йӧсӧ, куанле годымемат возем. Шке почеламутем-влак дене республикнан тӱрлӧ районлаштыже, Озаҥ, Шупашкар олалаште выступатленам. Лектышат уло, тӱрлӧ конкурслаште сеҥыше радамыш лектынам. Сылнымут саскам-влак, шке лудшыштым «Ямде лий», «Марий Эл» газетлаште, «Ончыко» журналыште, «Эрвий» альманахыште муыныт.
— Шукерте огыл, интернетыште «Ӧндал мыйым» видеоклип лектын ыле. Шкендычым муро аланыштат тергаш тӱҥалынат?
— Тыгеат каласаш лиеш. Икымше мурем, «Йӧратем» маналтын. Мурым возымек, чоныштем кугу куан лийын. Тидым мут денат каласаш огеш лий, шонем кӧ икымше гана мурым воза, калыкыш луктеш тыгак куана. Варажым, «Ӧндал мыйым» мурым возышна, клипым сниматлышна. Кызыт кумшо мурым ямдылена.
— Анита, йодыш-влаклан вашештыметлан пеш кугу тау. «Кидшер» интернет-журналын коллективше тыланет, шочмо марий калыклан у сылнымут да мурсаска-влакым шочыкташ тылана.
— Тау.
Николай Любимов мутланен.