Чеверын, пагалыме режиссёр…

0
409

Валентин Андреевич Кудрявцев. Кӧн илыш пӱрымашыже кундемыштына Марий телевидений дене кылдалтын гын, тиде айдемым палыдыме еҥже укеат, очыни. Марий тӱвыран сулло пашаеҥже, Марий телевиденийын ветеранже, пӱтынь илышыжым йӧратыме пашажлан пӧлеклыше, 48 ий режиссёрлан пашам ыштыше, телевиденийыште тыршыше кызытсе ятыр пашаеҥын туныктышыжо ош тӱня дене чеверласыш.
Телевиденийлан тений 55 ий теме. Шукерте огыл лӱмгечым палемдышна. Пайрем погынымашыш ятыр ветеран толын ыле. Нунын коклаште Валентин Адреевичат. Пырля пашам ыштыше йолташыже-влакым вашлийын, чон почын кутырен, саламлен. Манаш веле, 48 ий да кум тылзе осветитель гыч тӱҥ режиссёр марте эреак ик верыште, ик коллективыште тыршен.
Кок арня ончыч, шочмын «Пошкудем» передачым возышна. Эфирыш тудо але лектын огыл, сентябрь тӱҥалтыште лиеш. Ветеран-влакым Валентин Адреевич Кудрявцев ден Нина Юлиановна Бельскаям ӱжынна ыле. Нуно шке йӧратыме пашашт, кузе телевиденийыш толмышт нерген кутырышт.
Валентин Адреевич телевиденийын вияҥме пагытыштыже, 16 ияш самырык рвезе толын. Андрей Андреевич тудын ачаже тыште режиссёрлан ыштен. Уржам ӱден шыдаҥым от нал, маныт калыкыште. 1965 ий гыч осветитель, оператор, режиссёр, тӱҥ режиссёр марте кушкын.
Ты жапыште шотленат от пытаре мыняр передачым, фильм ден очерк-влакым ямдылен. Эн сайже тӱнямбал да Россий кӱкшытыштӧ палемдылыныт. Ик эн тӱҥ пашаже «Финно-угорский мир» тележурналым ямдылымаш.
Фондышкына тудын пытартыш паша кечыжым возен кодымо. Эфирым тунам ме лач пырля ямдыленна ыле. 2013 ий, октябрь. «Пошкудем» видеоканал. Поро шарнымаште мемнан ямдылыме передаче-влак, монтаж, тудын ой-канашыже. Ме эреак илыш умылымаш, тӱняончалтыш, шочмо калыкна, эртыме корнына нерген кутырена ыле. Тудак мыйым фильм-влаклан сценарийым возаш да ямдылаш кумылаҥден. «Ом мошто, ом керт». А кушеч тӱҥалаш?", - манынам. «Шич да шонымашетым возо. Лектеш. Тый кертат.», - манын Валентин Андреевич.
Самырык-влакым эреак у пашалан кумылаҥден, шке профессийым аклаш, пагалаш йодын.
Станиславскийн ойлымыжым эре ойла ыле: «Эн тӱҥжӧ шкем огыл, а шке пашадам йӧратыза», - манеш ыле.
Пытартыш передаче... Пытартыш эфир... Кушкыжымын йӱкдажымат пытартыш гана кольым.... Шым тогдае... Уэш шым йыҥгырте.... Ме айдеме тукым эре пашана нерген шонена шол. Алагушко куржеш, кая шонена. Чылажымат жапыштыже шукташ тыршена. А мемнан лишыл еҥна мом ыштат, кузе илат, ала нунылан йӧсӧ, ала нуно огыт керт? Огынат шоналте шол, калтак.
Пагалаш, аклаш кӱлеш икте-весым. Валентин Андреевич, мемнан чоныштына Те курымешлан илаш тӱҥалыда. Чонда узьмакыште лийже.

Алёна Иванова

ВАШМУТЫМ КОДАШ

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.