Эртыше кечылаште Марий кугыжаныш университетыште Росаккредагентствын семинарже эртен.
Тушко аккредитацийым эртыше эксперт-влак погыненыт. Тудын темыже «Образовательный организацийын официальный сайтыштыже вераҥдыме увер-влакым кучылтын, кугыжаныш аккредитацийын у модельжым шыҥдарымаш». Каласыман, МарГУ негызеш тыгай семинар кок ий почела эрта. Тудым Росаккредагентствын директоржо Лемка Измайлова ден агентствын Йошкар-Оласе филиалжым вуйлатыше, МарГУ-н доцентше Михаил Петропавловский вӱденыт.
Семинарышке кӱшыл да кыдалаш тунемме тӧнежла гыч 70 утла еҥ толын. Чылаже 22 ола гыч. Тиде — Москва, Санкт-Петербург, Озаҥ, Ижевск, Чебоксар, Киров, Самара, Кострома, Уфа, Ульяновск, Угарман, Оренбург, Саратов, Пермь да молат.
Тӱҥалтыште семинарыш толшо-влакым МарГУ-н ректоржо Михаил Швецов саламлен да вузын вияҥме актуальный направлений-влак нерген каласкален.
Росаккредагентствын Йошкар-Оласе филиалжым вуйлатыше Михаил Петропавловский тӱҥ докладым ыштен. Тудын темыже «Образовательный организаций-влакын официальный сайтыштын содержаний ден структурышт палемдыме требованийлан келшен толмо шотышто шымлымашын лектышыже».
Таче эксперт-влаклан компьютер класслаште практический занятийлам эртарыме. Тыгак «йыргешке ӱстелым» погымо Тудын темыже — «Туныктымо программе-влаклан экспертизым эртарыме годым образовательный организаций-влакын официальный сайтыштышт вераҥдыме уверым кучылтмаш».
Леонид Гимаев