Тиде кечылаште МарГУ негызеш Россий кӱкшытан профессионал мастарлык студент олимпиаде эрта. Тудым ямдылымашке вузын волонтержо-влак кумылын ушненыт. Тидлан лӱмын оргкомитетын погынымашыжым эртарыме.
Профессионал мастарлык таҥасымашке Россий Федерацийын шым вузшо гыч студент-влак ушненыт. Тиде – Санкт-Петербургысо да Оренбургысо кугыжаныш аграрный университет-влак, Угарманысе, Вяткысе, Ижевскысе, Чуваш кугыжаныш ялозанлык академий-влак, Озаҥысе кооперативный институт ден тысе Н.Э. Бауман лӱмеш кугыжаныш ветеринар медицине академий.
Икымше кечын вузла гыч толшо делегацийлан вуйлатышышт дене «йыргешке ӱстел» эртен, студент-влак теорий дене шке шинчымашыштым тергеныт. 30 октябрьыште олимпиадын кокымшо туржо – практический паша. Вара тӱрлӧ кундем гыч толшо уна-влаклан «Семеновский» племзаводын кумыс фермышкыже экскурсийым эртарат.
Олимпиадын лектышыжым иктешлыме годым сеҥыше ден призер-влаклан диплом ден шергакан пӧлекым кучыктат.
Леонид Гимаев