М.Шкетан лӱмеш Марий кугыжаныш драме театр 3 ноябрьыште 18 шагатат 30 минутлан «Эх, кушто ӱдырым муаш?» комедийым ончаш ӱжеш.
Авторын — Алексей Поповын произведенийже-влакым марий, удмурт, мордва, финн, хакас да Российысе моло калыкын йылмылашкышт кусарыме. Тудын пьесыже-влак почеш шындыме спектакль-влак тӱрлӧ сценыште ончыкталтыт. «Эх, кушто ӱдырым муаш?» пьесыже музыкальный комедий жанр дене возалтын.
Тиде шкешотан да оҥай историй, ӱдырым налаш кумылаҥше, но шкаланже оръеҥым муын кертдыме самырык пӧръеҥ Николай нерген. Ты куштылго огыл сомылым шукташ тудлан эн сай йолташыже полша. Сылне ӱдырым вашлиймеке, Николай чынже денак тудым моткоч чот йӧратен шында.
Спектакльыште шуко мыскара уло. Тудыжо шинчавӱд лекмешкак воштылаш, герой дене пырля тургыжланаш, куанаш тарата.
