Кумдан палыме писатель Я.П. Майоров-Шкетанын мутшо почеш, марий йылмым пеҥгыдемдыме шотышто сылнымут пеш кугу пайдам конда. Чынак, сылнымут илышым чын умылаш туныкта, шонаш тарата, шортара, куан кумылым луктеш.
Сылнымут идалык мучашлалтеш. Ты идалыкым иктешлыме семын, «ВийАр» тӱвыра да келшымаш кыл ушем да Талантан йоча-влаклан калыкле президент школ-интернат «Сылнымут батылым» эртарышт.
Таҥасымашыш «Кугарня» газетын журналистше-влак, Талантан йоча-влаклан калыкле президент школ-интернатын тунемшыже, И. С. Ключников-Палантай лӱмеш тӱвыра да сымыктыш колледжын да Марий кугыжаныш университетын студентше-влак ушненыт.
Участник-влак шке почеламутым лудмо мастарлыкышт дене палдарышт: шонаш таратышт, ӧрыктарышт. Сылнымут касыште тӱҥ шотышто Сергей Чавайнын, Зоя Дудинан, Татьяна Пчёлкинан, Зоя Вис-Висын, Надежда Иванован почеламутышт йоҥгыш. Талант памаш виян, лӱддымӧ.
«Сылнымут батл» икмыняр тапыр дене эртен. Почеламутым сылнын лудмо деч посна жюри почеламутын чоҥылтыжым, стопаже-влакым палымым терген. Тидын годымак, участник-влак шкештат сылнымутчо лийыныт, почеламутым возеныт. Вич минут жапыште сылнымут корнылам шочыкташ манаш веле! Кажне командын мурпогыжо ойыртемалтше лийын. Тылеч посна теорий, кусарымаш пашам шуктымаш тапыр пайдалын эртен. Пытартышлан команде-влак викторинысе йодышлан вашмутым пуэныт.
Конкурсыш ушнышо-влак чыланат книга пӧлек дене палемдалтыныт. Тиде пайремым эртараш Зоя Дудина, Владимир Козлов, М. Шкетан лӱмеш Марий кугыжаныш драме театр, «Кидшер» интернет-журнал полшеныт.
Каласен кодыман, «ВийАр» тӱвыра да келшымаш кыл ушемын еҥже-влак 15 декабрьыште сылнымут касым эртараш палемденыт.
Сай шонымашан мероприятийым «ВийАр» эртара. Молан фотожо шагал? Шукырак ончымо шуэш.
Нелеш ида нал, лишыл жапыште шукырак фотосӱретым ончыктена. Тау.