Чеверын, Валерий Яковлевич… Эше ик йомдарымаш…

Чумыр марий калык шке чолга, поро кумылан эргыжым йомдарымылан кӧра чамана. Кылме тылзын кумлымшо кечынже Параньга районын эргыже, уста журналист, амалкалче Валерий Яковлевич Очеевын шӱмжӧ вучыдымын кырымым чарнен. Тудлан 48 ий ыле.
Валерий Яковлевич 1967 ий 26 сентябрьыште Параньга районысо Олор ялеш, колхозник ешеш шочын. 1984 ийыште Олор кыдалаш школым тунем пытарен. Вара армийыште служитлен. Марий рвезым Армений марте наҥгаеныт. Шочмо эллан порысым шуктымек, верысе озанлыкыште пашам ышташ тӱҥалеш.  Но шуко жаплан огыл. Весела кумылан, ушан-шотан рвезым ВЛКСМ Марий Турек райкомыш инструкторлан налыт. Тушто Валерий Яковлевич кок ий пашам ышта, орготдел вуйлатыше марте кушкеш. Вара тиде районыштак «Знамя» газетыш кусна. Тышеч журналистике корныжо почылтеш. 1991 ийыште «Кугарня» газет савыкталташ тӱҥалмеке, Валерий Очеевым корреспондентлан пашаш налыт.  Очеев ВалерийКум ий ты газетыште тыршымек, Параньга посёлкыш пӧртылеш да «Марий эрвел» газетым лукшо группын вуйлатышыже лиеш. Икымше ийыштак Валерий Яковлевич газетын тиражшым кок пачаш кӱзыктен кертын. Тыгодым редакцийыште корреспондентын, фотографын, ответственный секретарьын, редакторын, набор операторын да корректорын сомылжым шуктен шоген. 1997 ий гыч «Пульс-Радио-Йошкар-Ола» радиостанцийыште марий передаче-влакым ямдыла. 2001-2002 ийлаште «Марий Эл» кугыжаныш теле да радио компанийыште кечывал телеканалын «Кечывал кечын» вӱдышыжлан тырша. Варажым, «Марий Эл Радиош» пашаш кусна. «Поро лийже. Пытартыш увер-влак дене «Увер йогын». Студийыште Валерий Очеев…», — нине мут-влак кызытат пылышышлан йоҥгат, но радиошто гына огыл… Радио гыч кайымек, Валерий Яковлевич Очеев ятыр авторын книгажлым лукташ полшен, да пытартыш жапыште у книга-влак дене пашам ыштен. Тачысе кечылан тудын полшымыж ден кугурак тираж дене гына 27 книгам лукмо.
«ВийАр» тӱвыра да келшымаш кыл ушемын еҥже, «Марий Эл Радион», «Кидшер» интернет-журналын, «Увер йолва» сайтын, М.Шкетан лӱмеш Марий кугыжаныш драме театрын коллективше-влак, пелашыж ден эргыжлан, родо-тукымжылан, келге чаманымашым ойлат.

Кидшер
Шонымашым ешараш

  1. Александэр

    Кийыме мландыже пушкыдо лийже.

    Ответить