Университетыште шанче кино фестиваль

Ынде кок тылзе наре МарГУ-што актуальный шанче кино фестиваль эрта.
Тудым почмо годым вузын науко паша да инноваций дене проректоржо Анатолий Леухин палемден: «Фильмыште ончыктымо шымлымаш паша-влакым мемнан университетысе ученый-шамычат эртарат, ме тидын дене кугешнен кертына».
Каласыман, тиде фестивальым Российысе туныктышо да шанче министерстве эртара. Тудын программышкыже МарГУ-м официально пуртымо. Таче кечылан «Страсти по частицам», «Чувственная математика», «Принтер будущего», «Планета» фильмлам вузын студентше ден Йошкар-Оласе школла гыч тунемше-влак онченыт. Теве «Страсти по частицам» документальный фильмым ончымо деч вара студент-влак шке шонымашыштым каласеныт. Иван Росляков (физике да математике факультет, II курс): — Тиде фильм тӱнямбалсе эн кугу адронный коллайдер нерген. Шукертак тудын шумлык пален налаш шоненам. Мылам гын фильм пеш пайдале лийын. Тудо шонаш тарата да шымлыме пашашке ушнаш кумылаҥда».
24 декабрьыште шанче кино фестиваль «Чудеса России» фильм дене мучашлалтеш. Кӧн кумылжо уло гын, тудым МарГУ-н тӱҥ корпусыштыжо оксам тӱлыде ончаш лиеш.

Леонид Гимев

Кидшер
Шонымашым ешараш